Oranjestad - Aruba, 6 Mei 2016: Recientemente Departamento di Recurso Humano (DRH) a anuncia cu dia 10 di mei na Biblioteca Nacional nan lo tene un job fair di y pa empleado publico. Minister di Finanzas, Angel Bermudez ta sostene e iniciativa aki ya cu segun e mandatario esaki ta promove e dinamismo den nos aparato gubernamental. "Cada empleado cu kier desaroya su mes profesionalmente semper mester tin perspectiva riba e posibilidad nan pa experiencia nobo. P’esey ta logico cu e mester tin bista riba e vacaturanan cu por ofrece e oportunidad aki", e Minister Bermudez a indica.

E mandatario a expresa den pasado cu un restructuracion den e aparato Gubernamental ta necesario pues e vacaturanan cu DRH ta ofrece den tur e departamentonan mester ta conoci pa un y tur pa asina cada empleado por averigua unda y con e por dal e siguiente paso den su carera ya sea den su propio departamento of den otro departamentonan. Na mes momento den un temporada caminda tin un paro den reclutamento di personal, mas mobilisacion di e capital humano den e aparato gubernamental ta sumamente importante pa logra haya "the right men/woman for the right job", asina Minister Bermudez ta splica.

A pesar di e paro aki, si tin algun vacatura disponibel riba tereno hopi specifico, pues nan ta rekeri di profesionalnan prepara, cu experiencia y di nivel pa eherce e funcionnan aki. E personal di DRH ta informa cu e ta importante pa e profesionalnan cu diploma HBO of WO pa actualisa nan CV y pasa bishita e job fair "Trahando den Sector Publico" pa asina nan forma parti di e banco di solicitante di trempan caba. Minister Bermudez a menciona cu ademas di e tayer y charla, sigur lo tin hopi informacion di interes pa cada empleado publico y cu por yuda cada un den nan carera.

Expresionnan haci den e articulo aki no necesariamente ta refleha opinion di ArenaPoliti.co