Hunto cu Minister ing. Mike de Meza, Prome Minister Mike Eman a topa cu Secretario di Estado John Kerry. Esaki a sosode durante un ceremonia organisa pa tur delegacion den conexion cu 'Council of the Americas 46th Annual Washington Conference of the Americas' y 'US Caribbean-Central American Energy Summit'. Durante un discurso pa mandatario y hefenan di estadop di varios pais, secretario Kerry a papia di un futuro singular cu emisionnan abou di CO2. "Esaki ta sosode na paisnan cu ta genera nan energia for di solo y biento cu nan tin na abundancia. Ta remarcabel y sigur di aplaudi e transicion cu ta tumando lugar, ora nos realisa cu implementacion di energia solar a aumenta 20 biaha den continente Mericano".  Aki secretario di Estado John Kerry ta referi na uzo di energia genera di fuentenan alternativo den nos region. E esfuerso y logronan di Aruba ta den liña cu locual secretario Kerry a remarca. E isla Aruba awor a yega na un produccion di 40% di su consumo di energia cu ta bin di fuentenan sostenibel cu e fin di ta carbon-neutral na 2020. Un compromiso cu a wordo acorda na Rio+20 hunto cu Sir Richard Branson y su organisacion Carbon War Room.

Expresionnan haci den e articulo aki no necesariamente ta refleha opinion di ArenaPoliti.co