E siman aki un mocion a wordo acepta den Tweede Kamer na Hulanda pa baha e cantidad di ora pa 20 ora di les pa siman pa un maestro di scol secondario. A pidi tambe pa un maestro di scol basico traha dilanti klas 4 dia pa siman enbes di 5, pa asina tin mas tempo pa prepara lesnan di calidad. Na e momento aki, un docente cu ta traha full time na Hulanda, ta traha 27 lesuur dilanti klas. E resto di su 40 klokuren, e ta pa prepara su lesnan, delibera cu su coleganan y tuma tempo pa keda na haltura di innovavion den su materia.

Paul van Meenen miembro di fraccion di D66 den Parlamento di Hulanda, a logra haya sufficiente voto pa su mocion, despues cu esaki a wordo bari for di mesa dos biaha caba. Pero nos por wak un biaha mas cu 'De aanhouder wint'. Su perseverancia a pone cu e di tres biaha si el a logra, door cu PVDA politico Diederik Samson a bin cu un plan cu ta yama: 'De Nieuwe School.'

Na Hulanda e cantidad di ora cu un maestro ta traha dilanti klas, ta 27 ora di les. Na Colegio Arubano esaki tambe ta e caso. Pero te awor esaki no ta e caso na a scolnan pa Mavo y EPB. Eynan un maestro lo mester traha 5 lesuur mas pa e mesun pago, pues 32 oranan dilanti klas. Esaki ta un diferencia grandi, un peso pisa y e ta inhusto, pasobra e trabou no ta menos duro, si no e lo ta hasta mas duro pa varios motibo. Maestronan di scol basico ta wordo paga menos cu maestronan di scol secondario.

Na Aruba, lamentablemente, nos tin un situacion caminda pa mayoria di e alumnonan e idioma Hulandes ta un idioma stranhero. Nos muchanan ta domina otro idiomanan mihor cu Hulandes. Pavia di esaki, e trabou di un maestro of docente aki na Aruba ta hopi mas pisa. Si nos ta conta acerca cu Gobierno a hisa e edad di pensioen, cu nan ta calcula bo pensioen a bsse di bo middelloon y no mas manera antes a bsse di bo eindloon, tambe cu semper falta material adecua y innova pa garantisa e calidad di educacion y cu despues cu un maestro a yega na e edad di 38 aña, su entrada no ta subi mas pero innovacion technico ta haci cu e calidad di e contenido di educacion aki na Aruba ta keda tras y pa colmo e 'plan' di Ex Minister di Enseñansa Dowers, pa recalcula e trabou y salario di maestronan, no a wordo implementa tampoco... E ora ey, ta tempo pa nos traha espacio pa discussion, pasobra esey so lo yuda!

Mi no ta kere tampoco cu nos lo logra haya maestro di Hulanda pa traha 8-12 lesuur mas pa e mesun pago of hasta menos pago cu na Hulanda. Nan lo exigi un pago mas halto, cual lo laga nos maestronan parce maestro di segundo klasse, algo sumamente indesea. Of locual por pasa, ta un exodus di maestronan di Aruba pa e Islanan di BES den Reino, cual tambe lo bay cay bou di e plan nobo di PVDA: 'De Nieuwe School'. Pues, esaki mester bira un topico di discussion. Na comienso mester wordo investiga con pisa e trabou di un maestro na Aruba ta di berdad y di dos, con pa hisa e calidad di nos educacion.

Mi no ta bisa cu esaki ta e opinion di partido MEP, esaki ta mi propio opinion tocante e desaroyonan recien y preocupacionnan cu mi kier comparti cu pueblo. Pa tur esnan cu ya caba ta cla pa bisa cu no tin placa: Locual nos no ta inverti den educacion awo, nos lo paga hopi mas na problemanan social y e effectonan di un aumento di criminalidad. Rond mundo ta conosi, cu manera e nivel di educacion di un pais subi, su cifranan di criminalidad ta baha, pa e simpel motibo, cu mas conocemento ta trece pa hendenan tuma miho decisionnan pa soluciona nan problemanan. Ningun hende ta nace sabi, ningun hende ta nace criminal, pues ban cambia di awo, locual nos kier logra mayan!

Expresionnan haci den e articulo aki no necesariamente ta refleha opinion di ArenaPoliti.co