Sta.Cruz – “E desaroyonan den ultimo lunanan ta preocupa mi. Gobierno di Mike Eman dia pa dia ta mustra mas senjalnan dictatorial. Lagami splica mi mes.

E ley di all-inclusive ta djis e comienso. Minister Otmar Oduber cu e ley aki kier ta e UNICO cu lo bai dicidi ken por bende mas kamber all-inclusive, y con e ta bende esey. No tin ningun ‘guide line’ tampoco con e por determina esey, poniendo tur poder den man di un solo minister.

El’a hasi mesun cos den e beach policy, menasando di retira tur permiso existente, y e so lo bai dicidi ken por haya permiso nobo.

Den ambos caso no ta trata talves di hopi hende afecta, pero ora e mesun minister a mustra e mesun dictadura cu 400 taxista, diripiente mas hende a cuminsa sinti cu aki nos tin un minister dictador. Pasobra pa motibonan cu ainda e minister no a splica, a mete den e forma con taxistanan ta hasi nan negoshi, y awor hasta kier dicta kiko e taxista por hasi ora e fayese. Un tradicion di basta anja, cu a yuda basta famia, den cual e permiso ta pasa di tata pa yiu, awor arbitrariamente e minister kier elimina.

Minister Otmar Oduber ta mustrando senjalnan peligroso di un dictador, y aparentemente ni Mike Eman no por control’e mas.

Si e kier dicidi con hotelnan ta hasi nan negoshi, y e kier dicidi ken mag di opera riba beach, y si e kier dicidi kiko ta pasa cu e permiso di un taxista despues cu e taxista fayese, kiko ta next?

Nan por bin dicidi ki color bo mag di verf bo cas? Nan por bin dicidi kiko abo ta come mainta of merdia? Si bo tin negoshi, nan por bin dicidi ki marca, of ki color bo mag di bende? Nan ta dicidi kiko bo por hasi cu bo pertenencianan despues cu bo fayese?

Esaki ta e prome senjalnan di dictadura. Venezuela tambe tin un presidente eligi democraticamente, mescos cu esun di Aruba, pero nos por mira kiko ta pasando na nos pais bisinja.

Si nos acepta e senjalnan aki di dictadura, te unda nos ta dispuesto pa bai? Locual ta hala mas atencion ta cu ta serca un minister so bo ta wak esaki, minister Otmar Oduber. E prome senjalnan di dictadura mester ta un senjal di alerta pa tur hende, ta e direccion aki abo kier pa Aruba bai?

Expresionnan haci den e articulo aki no necesariamente ta refleha opinion di ArenaPoliti.co