Prome Minister contento cu e trabou cu henter su gabinete e desplega 

ORANJESTAD - Ayera, den oranan di atardi, Standard & Poors (S&P) a emiti un boletin caminda cu ta anuncia cu a subi rating di Aruba, for di 'stable outlook' pa un 'positive outlook'. E agencia di acreditacion financiero ta mustra riba e hecho cu Aruba a haci trabounan importante den baha su deficit di un manera sostenibel y tambe mehoracion economico mirando e acuerdo cu Citgo cu ta bay conduci na reapertura di e refineria na San Nicolas.

Prome Minister a duna credito na e strategia financiero-economico consistente cu a e gabinete cu e ta lidera a hiba tur e tempo aki. "Esaki naturalmente ta parti di un proceso cu nos a bisa desde comienso cu nos a acepta e responsabilidad di nos gobernacion, cu nos lo enfoca den e prome periodo di 2009 pa 2013 riba recuperacion economico di nos pais y un atencion social grandi pa esnan di menos recurso."

E realidad economico cu a haya na 2009 ta uno totalmente diferente cu nos tin na e momentonan aki, segun sr. Eman: "Na momento cu nos a drenta gobernacion tabata tin un realidad sumamente dificil caminda cu economia a cay durante e gobernacion anterior cu 15% door di ciere di refineria y e diferente medidanan cu a wordo introduci durante añanan, entre 2001 cu 2009. A perde hopi entrada tambe for di turismo, cu a cay tambe e tempo ey. Aruba a perde tambe diferente partnernan strategico, manera KLM, Carnival Cruises y American Airlines y perspectiva economico y di turismo tabata sumamente negativo. Nos a mira cu Aruba tabata tin mester di un inyeccion economico cu probablemente mester a bin for di e sector di gobierno, pasobra sector priva tabata pasando den e crisis den e momento ey."

E strategia tabata basa riba inversion prome y despues cu e recuperacion bolbe, ta traha tambe riba saneamento financiero. "Nos a delinea un maneho cla pa stimula e economia di Aruba, sostene esnan di menos recurso, den e periodo complica aki y semper a bisa cu nos lo cuminsa tambe di biaha, despues cu nos mira e recuperacion economico, na a trece tambe un balansa den e deficit di pais Aruba," sr. Eman a enfatisa. "Esaki tabata e tarea principal tambe na momento cu e di dos termino di nos gabinete a inicia y hunto cu e reformanan cu nos a introduci den e fondonan di pensioen y salud."

Standard & Poors ta bisa tur esaki tambe den su argumentacion: "Following pension and health care reforms (approved in 2014), the fiscal agreement with the Netherlands in May 2015... and expenditure containment and a more active revenue collection strategy, Aruba's general government deficit declined to 3.3% of GDP in 2015 from 6.3% in 2014. The fiscal agreement contemplates a 2% general government deficit in 2016, 0.5% deficit in 2017, and a surplus in 2018."

Algo cu sr. Eman ta bisa cu ta hopi importante ta e siguiente frase di S&P: "Our base case estimates that Aruba will be able to broadly comply with the goals, and we expect general government deficits of around 2% of GDP on average during 2016-2018." Loke Standard & Poors ta bisa ta cu nan ta mira cu gobierno di Aruba a cana e caminda di percura pa e reformanan, tanto riba tereno di fondonan di pensioen, seguro medico riba reduccion, di gastonan di gobierno y a percura tambe pa loke ta trata e deficit di pais Aruba por a baha substancialmente.

Segun Standard & Poors ta mustra cu locual a pone den e ley, cu Aruba a pasa pa garantisa stabilidad financiero, Aruba ta alcansa un deficit di 2% na 2016 y na 2017 un di 0.5%. S&P hasta ta mira un surplus despues di 2017 y ta duna credito na e hecho cu Aruba ta logra esaki basa riba e consistencia cu cual gobierno di Aruba a bin ta ehecuta su maneho economico financiero.

Prome Minister Eman a duna credito na henter su gabinete cu a traha duro y conhuntamente pa por a logra tur e metanan halto y importante cu ta culmina den loke S&P ta emiti. "Mi ta kere un dia grandi pa nos gabinete, pa nos minister di finansas sr. Bermudez, nos ministernan di finansas anterior sr. Yrausquin y sr. de Meza," sr. Eman a enfatisa y tambe, "henter nos gabinete, nos minister di Turismo Otmar Oduber, nos ministernan economico tambe, Michelle Hooyboer."

Sr, Eman a reitera cu, "e tempo ey un esfuerso grandi a wordo haci pa pone un caminda nos dilanti caminda nos lo inverti den infrastructura cu nos colega, minister di infrastructura sr. Sevinger a carga cu alma y curpa. Tur e inversionnan aki a traduci nan mes den un recuperacion economico manera Standard & Poors ta reconoce tambe."

Prome Minister a bisa di ta hopi orguyoso di e importancia cu S&P a duna na reapertura di refineria y a expresa su felicitacion na Minister encarga cu asuntonan energetico di Aruba, ing. Mike de Meza, "cu a traha dia y anochi e acuerdo aki."

Expresionnan haci den e articulo aki no necesariamente ta refleha opinion di ArenaPoliti.co