ORANJESTAD - Construccion di e area dilanti di Waf di Crucero na Oranjestad, Paardenbaai Plaza, ta basta avansa. Parti di e proceso di embeyecemento di Producto Aruba ta encera cu ta muda e kiosconan, cu na e momentonan aki e kiosconan ta situa net pariba di e parada principal di Arubus na Playa, mas cerca di entrada di e waf. E intencion ta cu, hunto cu e mudamento, ta haci trabou di mehora e producto den su totalidad.

Prome Minister Mike Eman durante un encuentro cu prensa e siman aki a bisa cu “e kiosconan aki lo wordo poni riba Paardenbaai Plaza cu ta practicamente cla. E kiosconan nobo ta hopi bunita. Tur esnan cu ta situa awor banda di e parada di bus lo muda pa e kiosconan nobo construi na e otro banda di caminda. Henter e area aki ta wordo hinca den un concepto cu ta ilustra un solo imagen cu Aruba mester demostra cerca su bishitantenan."

E intencion di Gabinete Mike Eman ta cu e productonan cu ta bay wordo bendi den e areanan aki ta di artesanonan local. E grupo di artesanonan lo uni pa e productonan cu e bishitantenan haya aki ta 'Made in Aruba'. Eman a splica tambe cu e parti cu lo keda bashi, banda di e parada di bus, ta wordo integra den e totalidad di e desaroyo cu ta tumando luga na Rancho Plaza; Driemastraat tambe ta forma parti di e fase aki di renobacion.

Expresionnan haci den e articulo aki no necesariamente ta refleha opinion di ArenaPoliti.co