ORANJESTAD – Gabinete Mike Eman ta continua cu su enfoke riba trabounan den bario. Semper ta busca manera pa renoba barionan, hopi biaha sin cu mester aumenta e presupuesto nacional. E prioridadnan di Gobierno den esaki ta pa mehora e infrastructura y ademas crea espacionan publico manera parkenan di recreacion. E siman aki Minister President Mike Eman a duna di conoce cu ta studiante e posibilidad pa yega na material cu lo yuda asfalta mas camindanan rond di Aruba.

Iluminacion publico y asfalt pa camindanan ta e dos puntonan cu mas tanto Premier Eman ta tende di ciudadanonan durante su bishitanan semanal den bario. Pa loke ta e iluminacion publico, a logra hunto cu ELMAR N.V. pa yega na un proyecto cu ta ‘budget neutral’ Actualmente ta cambiando e lampinan convencional pa LED cu ta usa menos energia y loke ta spaar eynan ta wordo inverti bek den instalacion di puntonan nobo di luz. E luznan nobo ta bay den diferente barionan caminda tin mester di esaki.

Asfalt pa caminda ta diferente y un poco mas complica ya cu ta trata di un presupuesto hopi pisa y aunke Gabinete Mike Eman I y II a logra di asfalta hopi caminda caba durante ultimo añanan, tin bes e fondonan no ta alcansa pa por trece asfalt tur caminda luga falta ainda. Prome Minister ta spera cu den proximo añanan por yega mas leu y pesey ta pensa y wak den otro opcionnan cu por presenta.

“Nos tin na e momentonan aki, den e proceso di e refineria cu nos ta bay haya bek, loke nan ta yama un ‘asfaltmeer’ cu ta parti di un deposito di petroleo hopi pisa cu durante 70 aña a wordo acumula den un buraco riba e tereno di refineria,” Premier Eman a splica. E mandatario a bisa acerca cu “Na e momentonan aki ta haciendo un test pa wak si parti di e producto ey por wordo uza pa asfalt. Si esey por, e ta bay yuda baha e gastonan y Gobierno ta bay ta den un miho posicion pa laga asfalt yega den mas di e barionan cu ta pidiendo p’e.”

Minister President Eman ta spera cu den proximo simannan lo por yega na un resultado y cu esaki lo ta satisfactorio pa cu e plannan di mehoracion di barionan. Di e manera aki lo por sigui traha riba e lista di bario caminda lo por brinda e ciudadano un miho calidad di bida pa medio di un infrastructura digno.

Expresionnan haci den e articulo aki no necesariamente ta refleha opinion di ArenaPoliti.co