ORANJESTAD – Diahuebs atardi stakeholders den e proyecto di desaroyo y construccion di Facilidad Multifuncional (MFA) di Paradera a reuni na e edificio nobo pa realisa e ceremonia di entrega di yabi. Esaki a bay for di man di compania constructor Bic N.V. pa Stichting Onroeroend Goed Aruba y na su luga, nan a entrega esaki na Pais Aruba. Minister President Mike Eman representando Pais Aruba a ricibi e yabi nan y pasa nan pa e Management Team di MFA y particularmente Sr. Elton Hart como e Manager di MFA Paradera.

Den su palabranan Prome Minister a cualifica e momento como uno masha importante den e vision di su Gabinete pa duna cada bario un centro di servicio publico y ademas encuentro social, pero sigur sumamente importante pa e propio comunidad di Paradera. A remarca di ta masha orguyoso di por bisa cu e edificio a wordo diseña pa un arkitecto local cu ta Joel Croes y construccion tabata den man di un compania local tambe di e bario di Paradera.

Danki na nan y na varios otro instancia, manera Aruba Investment Bank (AIB) y DOW, “nos por entrega na e pueblo di Paradera un facilidad cu ta bay haci e trabou, cu Hulpbestuurskantoor (HBK) ta dunando na e momento aki, hopi mas agradabel y hopi mas eficiente; tanto pa esnan cu ta busca e servicio como tambe pa esnan cu ta traha den e edificio,” asina Premier Eman a splica.

E edificio ta bira sede di Hulpbestuurskantoor cu tur su servicionan di Censo, como tambe pa Servicio di Impuesto y asina tin varios mas. E constelacion final di entidadnan publico y priva cu lo ta den MFA Paradera ta bay keda cla y anuncia pronto. E pone luna di october pa realisa e apertura oficial y e ekipo ta trahando fuertemente pa logra e meta aki.

“Dentro di corto por ofrece e pueblo di Paradera un joya di edificio y servicio cu ta digno di e comunidad di Paradera, cu ta bay tin hopi facilidad y espacio publico pa actividad y pueblo por topa cu otro y comparti momentonan ameno,” tabata e palabranan di Prome Minister. El a añadi bisando cu “ta cumpli asina cu tur e pensamentonan cu Gobierno di Aruba tin di con hunto un desaroyo comunitario por percura pa mehora e calidad di bida y e servicio cu ta duna como gobierno.”

Expresionnan haci den e articulo aki no necesariamente ta refleha opinion di ArenaPoliti.co