Minister Benny Sevinger na apertura di MFA Paradera. 

ORANJESTAD – Minister di Infrastructura Benny Sevinger ta hunga un papel clave den e realisacion di proyectonan di MFA, mescos cu otro proyectonan importante tumando luga riba nos isla manera Green Corridor, Hospital, Waf di Barcadera entre otro. Como tal, e anochi di apertura oficial di MFA Paradera tabata uno di satisfaccion pa e mandatario caminda a elogia su ekipo di trabou, arkitecto Jouel Croes, contratista BIC N.V. y otronan involucra. Su aprecio principal a bay na e origen di e vision y esey ta e trabou haci hunto cu Prome Minister Mike Eman. “E vision cu a bin for di temponan di oposicion caminda bo ta prepara bo mes pa ora bo ta den Gobierno bo ehecuta plannan cu ta hiba bo bario, bo pueblo y bo Aruba na otro nivel di bida,” Minister Sevinger a bisa den su discurso.

“Awe nochi ta un anochi di hopi alegria, un anochi cu nos a bini hunto pa un momento importante, un momento cu nos ta bay inaugura y en principio pasa over un proyecto na e pueblo di Paradera; un momento cu lo bay den historia como un di e momentonan mas importante di e bario aki,” e titular di Infrastructura a expresa.  

Na opinion di e mandatario, e vision aki ta uno mas grandi cu djis infrastructura. “Kico e infrastructura ta bay nifica pa e calidad di bida di un ciudadano na momento cu bo drecha un bario, ora bo drecha centro di ciudad, ora bo trece un MFA? Kico ta nifica traha un Green Corridor pa San Nicolas pa tur bario for di aeropuerto bay ariba? Kico ta nifica pa e calidad di bida pa Paradera na momento cu Paradera Corridor a wordo traha of Linear Park a wordo traha? E ta pa nos por cana, disfruta, integra,” esey Minister Sevinger a indica. “E ta e parti di e vision caminda nos ta wak cu infrastructura ta hunga parti importante.”

Adicional na e infrastructura di e pais, tambe tin e enfoke cu Gabinete Mike Eman ta pone riba e tereno social. “Premier Eman a mira con Gobierno mester ta cerca di su pueblo, duna servicio den e bario, tin un contacto entre e ciudadano y departamentonan di gobierno. Un centro caminda pueblo por haya servicio, bini hunto, caminda mamanan por haci diligencia, muchanan por hunga y e parti cultural tambe por tuma luga; tur servicio cu mester por sosode den cualkier ciudad.”

Minister Sevinger tambe a duna e debido reconocemento na famia di Mito Croes. “Un gran lider di Paradera cu a bay laga nos. E dedicacion ta refleha e amor respet y dedicacion cu Mito a duna su pais y principalmente su bario di Paradera.” Finalizando, e mandatario tabatin un mensahe na e publico cu  mas bien tabata un invitacion. “Esaki ta un cas di Paradera, laga nos cuid’e, haci bon uzo di dje, bin hunto manera un bario unico riba nos baranca. Laga nos comparti y disfruta, traha pa bosonan, pa nos por hiba e y calidad di bida na un siguiente nivel.”

Expresionnan haci den e articulo aki no necesariamente ta refleha opinion di ArenaPoliti.co