Lista di candidato lo mira cambionan. 

Den su discurso durante e celebracion di 45 aniversario di Partido MEP diadomingo cu a pasa, Lider di MEP, sra Evelyn Wever-Croes a reflecciona riba e 45 aña di MEP y tambe riba e añanan nos dilanti.

“Gobernacionnan di MEP durante e temporada di Antias y e 4 Gobiernonan di sr Nelson Oduber desde cu nos ta Pais Aruba, tabata gobernacionnan na unda cu semper e ser humano tabata e punto central. E bienestar di nos pueblo semper tabata na prome lugar”. 

Sra Evelyn Wever-Croes a elabora riba e diferente logroganan di partido MEP durante e 45 añanan di diferente gobernacionnan di MEP como tambe e manera drechi cu MEP a goberna nos Pais den tur tempo.
“MEP a construi scolnan, casnan pa vivienda social, cas pa nos grandinan entre otro. Hamas durante gobernacionnan di MEP nos tabatin insiguridad y criminalidad manera cu nos tin awo. MEP hamas a neglisha e cuido y salud di nos Pueblo manera awo ta e caso. Durante un Gobierno di MEP, hamas nos Pais a yega na e borde di bancarota manera e la yega den e Gobierno actual.
Nunca tabata tin asina hopi pleito den reino. Nunca nos Ministernan a brongosa e Pueblo cu un huelga di hamber manera tabata e caso di Minister President Mike Eman. Hamas un Gobierno di MEP a haya un KB manera gabinete Mike Eman a haya pa mal gobernacion, mientras cu ni sikiera un Gobernador Mike Eman por a nombra na un manera drechi”, sra Wever-Croes a bisa.

Sra Evelyn Wever-Croes ta sigura e pueblo cu una bez cu MEP drenta den gobernacion y trece e cambio cu nos pais tin mester di dje, tur e mal gobernacion di AVP lo pasa pa pasado y bay den historia como e gobernacion mas malo y bergonsoso cu Pais Aruba a conoce.

“Cu miras riba eleccion 2017, partido MEP un bez mas, contrario na partido AVP, lo pone e bienestar di e pueblo na prome luga”.

Falta solamente 11 luna pa eleccion electoral na unda pueblo lo dicidi e rumbo di nos pais. E 11 lunanan aki ta hopi crucial pa nos partido.
“Nos tin trabounan grandi cu nos mester haci. Encuestanan ta mustrando nos cu partido Movimiento Electoral di Pueblo ta creciendo y cu e sosten di e pueblo na e Gobierno di Mike Eman ta bahando. A base di e informacion aki, nos ta bay sigui traha. Naturalmente, nos no ta confia den encuestanan solamente. Nos tin trabounan grandi pa haci. Partido MEP lo drenta den cada skina di Aruba. Nos lo drenta den tur cas cu nos mensahe y plan di solucionnan conbina cu cambionan necesario y caranan nobo riba nos lista. Nos lo traha pa convence pueblo di Aruba cu Movimiento Electoral di Pueblo ta e unico solucion”, sra Wever-Croes ta bisa.

Expresionnan haci den e articulo aki no necesariamente ta refleha opinion di ArenaPoliti.co