Dia 5 di oktober na Aruba nos ta conmemora Dia Di Maestro. Un dia hopi significativo pa esnan cu, manera ami, a disidi di tuma e responsabilidad di yuda educa nos futuro generacion. 

Pero, kiko ta e rol di un maestro den nos sociedad actual? 
Den e mundo globalisa cu nos ta bibando aden, nos mester hendenan prepara pa realisa e rol di guia cu ta move nos comunidad na un mihor futuro, cu lo lanta e interes di haya mas conocemento serca e hobennan pa asina nan educa nan mes y keda leu for di ignorancia. 
E rol cu un docente tin den un comunidad ta sumamente relevante, di tal manera cu e no por keda ignora.

Nos ta bibando den un sociadad cu aunke nos ta gosa di un nivel halto di technologia y multiculturalismo, nos ta carese di educacion adecua.
Globalisacion a trece cun’e exigencianan educativo vooral den e ambito technologico, y aunke technologia a avansa inmensamente durante e ultimo decada, pa algun e no ta fasil pa adapta nan mes na e cambionan, pero pa otronan e ta precisamente un aliado educativo.

Un docente ta hunga un rol sumamente importante den e bida di e alumno y ta pa es motibo cu nos no por keda sin dun’e su relevancia necesario.
Un docente tin e deber di expresa su conocemento y demostra su capacidad di capta e atencion for di esnan cu e tin bou di su responsabilidad.

Mester tene na cuenta si cu e falta di motivacion di parti e hobennan pa sinja no ta cay totalmente bou di e responsabilidad di un docente. Pero parti di e trabou como maestro ta di motiva su alumnonan, propone technicanan nobo di ensenjansa pa asina logra un cambio den e “lifestyle” di hobennan studiante y asina yuda forma hendenan responsabel y coperativo pa nos comunidad.

Expresionnan haci den e articulo aki no necesariamente ta refleha opinion di ArenaPoliti.co