E situacion cu tin tocante criminalidad a sali for di man riba e pais aki. E anja aki tin un total di 53 atraco registra cual ta pa promer biaha den historia di nos pais cu tin asina hopi atraco. E cantidad di atraco ta alarmante, e cantidad di asesinato ta grave, e cantidad di ladronica ta demasiado y e panico den nos comunidad ta wordo sinti den tur skina riba e pais aki. Na e momentonan aki e gobierno aki no a pone siguridad como nos prioridad. Prioridad pa e gobierno aki ta organiza mas Green Conference, sigui derocha placa di pueblo, sigui nombra coordinadornan y no inverti den siguridad di nos pueblo. Na e momentonan aki NO tin placa pa ensejanza, no tin placa pa traha scolnan, no tin placa pa combati crimanalidad pero tin 700 miyon florin pa infrastructura. Nunca nos ciudadanonan a sinti nan mes asina insigur manera ta e caso actualmente. Tin un panico y un miedo enorme ta biba den comunidad. Simplemte e pueblo no ta sinti su mes sigur mas den su propio cas y esaki ta inacceptabel. Nos pueblo merece di biba den trankilidad. Nos pueblo mester wordo garantiza cu gobierno ta pone siguridad di nos tur na promer lugar. E situacion actual na Aruba ta sumamente preocupante. Tin un situacion di pobreza grandi na Aruba cu a conduci na un explosion social caminda tin mas y mas ladronicia y atraco riba e pais aki. E control nan nos fronteranan ta laga hopi di desea y tin masha hopi arma di candela den circulacion. Polisnan no tin equiponan necesario pa combati criminalidad. Algun siman patras a surgi un situacion caminda polisnan mes NO tin bulletproof vest y ta minister di turismo mester a percura pa haya esakinan. Ta situacionan hopi fastioso cu tin y envez cu ta crea siguridad ta crea insiguridad. Tin un gran marcha na caminda dia 13 oktober 2016 caminda nos ta spera nos tur cu ta biba riba e pais aki, cual sea bo color politico, rasa, religion of nacionalidad pa ban uni y demostra gobierno cu nos kier nos trankilidad bek.

Expresionnan haci den e articulo aki no necesariamente ta refleha opinion di ArenaPoliti.co