*29 di september 2016
Durante su bishita na Aruba Colegio a conseha Gobierno pa ahusta e presupuesto di 2017 den luz di e adaptacion descendente di e cifranan di crecemento economico di 2015 i 2016 di Banco Central.  

Oranjestad – Durante su bishita na Aruba dia 28 y 29 di september ultimo Colegio di supervision financiero di Aruba (CAft) a conseha, den luz di e cifranan di e crecemento economico decepcionante, pa sigura den e presupuesto supletorio 2016 ku Gobierno a priminti i un Nota di Modificacion cu e presupuestonan di 2016 y 2017 lo keda denter di e normanan di deficit stipula den e Ordenansa Nacional tocante supervision financiero temporal di Aruba (LAft). E cifranan reciente di Banco Central di Aruba (CBA) ta mustra cu tanto e crecemento economico real como esun nominal ya pa algun tempo ta stanca. E modificacion presupuestario di 2016 - cu por spera pronto - lo mester proporciona informacion mas detaya tocante na cua medida e efectonan positivo di reapertura di e refineria ta compensa e efecto negativo di e crecemento economico ahusta riba e ingresonan. Colegio ta observa cu e recomendacionnan di CAft i di Conseho Consultativo pa den e proyecto di presupuesto di 2017 ahusta e ingresonan na forma descendente lo mester ta refleha den e Nota di Modificacion. Den su conseho definitivo tocante e presupuesto di 2017 aproba Colegio lo analisa si e presupuesto ta cumpli cu e normanan di LAft.

Bishita extenso di CAft
Durante e bishita di CAft na Aruba Colegio a tene combersacion cu Gobernador, Ministro di Finansa y Organisacion Gubernamental, Conseho di Ministro y e Comision Parlamentario di Finansa, Asunto Economico y Organisacion Gubernamental. Den e combersacionnan aki a bini padilanti, entre otro, ehecucion di e presupuesto di 2016, e estado actual di e proyecto di modificacion presupuestario di 2016 y e proyecto di presupuesto di 2017, y e proceso di reapertura di e refineria. Colegio a haci tambe un bishita na Controlaria General.

E retonan di ehecucion di e presupuesto di 2016
Den su reaccion riba e reportahe di ehecucion tocante realisacion den e prome semester di 2016 CAft a indica cu Aruba, a base di e cifranan entrega, ta parce di ta bon na caminda pa cumpli cu e norma di LAft na final di 2016. Colegio a constata na e mesun momento cu realisacion den e prome mita di 2016 pa gran parti ta danki na ganashinan inespera como consecuencia di e cumplimento cu declaracion di impuesto riba ganashi (VAS) introduci na final di aña 2015, mientras cu e otro impuestonan ta mustra un rendemento desalentador. Desaroyo di e entradanan di gobierno tabata pues -banda di e refineria - un di e temanan principal den e combersacionnan cu Colegio a hiba na Aruba. Tambe bahamento di gasto atrasa den e gastonan di personal ta rekeri, segun Colegio, un enfoke specifico, ya cu esaki ta forma un obstaculo significativo pa por realisa un finansa publico sostenibel na termino largo. Door di ahustacion di e cifranan di e PNB na forma descendente e cuota di debe ta subi bay na 86% di e PNB na 2016, como consecuencia di e asina yama efecto di e denominado. Esaki ta pone di relieve un biaha mas e necesidad di perseverancia den e caminda di saneamento palabra.

Segun e palabracionnan haci pronto CAft lo ricibi e proyecto di modificacion presupuestario di 2016, den cua ta incorpora y splica e implicacionnan financiero-economico di reapertura di e refineria, proyecta door di Banco Central. Tambe a palabra cu Colegio pronto lo ricibi un analisis di e riesgonan financiero cu Aruba lo ehecuta pa identifica e riesgonan na termino cortico y na termino largo relaciona cu reapertura di e refineria. Ademas Gobierno a inicia un procedura pa elaboracion di un evaluacion di e impacto ambiental. E procedura aki lo tuma algun tempu.

Progreso di e presupuesto di 2017 y hustificacion respecto 2015
Den e periodo tras di lomba tanto CAft como Conseho Consultativo a emiti conseho tocante e proyecto di presupuesto di 2017 di Aruba. A keda denter di e plaso legal den cua entrega di e proyecto di presupuesto na Parlamento mester tuma luga, esta prome cu dia 1e di september. Debi na e presentacion na tempo na Parlamento ta di spera cu, di conformidad cu e stipulacionnan den LAft, lo entrega e presupuesto aproba di 2017 na CAft pa mas tarda dia 15 di december 2016. Durante su bishita na Aruba Colegio a conseha Gobierno pa ahusta e presupuesto di 2017 den luz di e adaptacion descendente di e cifranan di crecemento economico di 2015 i 2016 di Banco Central. Banco Central ta spera cu e volumen di economia di Aruba otro aña lo core den AWG 4,9 pa 5,0 mil miyon, mientras cu e proyecto di presupuesto di 2017 ta sali di un volumen di mas di AWG 5,3 mil miyon. Esaki ta nifica cu ta calcula e entradanan di gobierno na un forma demasiado optimista, manera Colegio ya caba a trece padilanti den su conseho anterior. CAft lo emiti un conseho definitivo di e presupuesto aproba di 2017, den cual lo evalua si e ta cumpli cu e norma di deficit maximo di 0,5% di e PIB proyecta pa 2017. Sin mas ahustacion ta poco probabel cu Colegio lo por yega na un evaluacion positivo.

CAft a ricibi cuminsamento di e siman aki e cuenta anual di 2015 di Aruba, y e ta spera di por ricibi a corto plaso e reportahe cu Controlaria General a elabora a base di e cuenta anual aki. A base di e documentonan aki CAft lo conseha tocante e hustificacion di Pais Aruba respecto aña presupuestario 2015. Colegio ta constata cu Aruba ta afronta mehoramento di e administracion financiero na un forma diligente. Colegio por haya su mes den e proposito di Gobierno pa pidi e Servicio Central di Accountant pa elabora un faseamento i un plan di accion realistico ku por resulta den un certificacion aprobatorio di accountant pa e cuenta anual.

Expresionnan haci den e articulo aki no necesariamente ta refleha opinion di ArenaPoliti.co