E ultimo relato di CAFT riba finansa publico ta un ehempel di con por saca conclusion parcial. Di un analisis incompleto. CAFT ta señala solamente e posible riesgonan. E no ta indica e oportunidadnan cu nos pais tin awor aki y den futuro sercano. Hasta for di e apertura di e refineria CAFT ta señalo solamente e posibel riesgonan. E mes un riesgonan cu oponentenan di e refineria a menciona durante di e reunion publico den Parlamento pa aproba e ley y acuerdonan pa habri e refineria. Niun caminda CAFT ta indica nada di e impacto di e apertura di e refineria riba economia di Aruba of riba entrada extra pa gobierno. Siendo cu e apertura di e refineria ta loke lo tin e impacto mas grandi a corto plazo riba economia y finansa di Aruba.

ANALISIS Y CONSEHO BALANSA
AVP semper a indica cu e no tin niun problema cu mas analysis y escrutiño di finansa publico. Al contrario. AVP semper a pensa cu mas nos sa y mas tempran nos haya sa, ta miho nos por actua pa soluicona y preveni. Hamas nos kier pa nos pais biba bou di e impresion robez manera cu gobierno di MEP a haci pa hopi aña, mientras cu e situacion tabata bay mas y mas malo tur dia. Parlamento domina door di MEP a keda keto! E resultado di esey tabata e crisis di 2009 y e decepcion den pueblo. For di 2009 esey nunca mas a sosode. Problemanan cu surgi ta wordo atendi. Con dificil cu nan por ta. E problemanan cu MEP a laga nos pais cun'e tabata grandi. Pero nan a wordo atendi y soluciona. Kier men cu pa AVP mas lihe gobierno y parlamento por actua ta miho. Pesey nos no tabata tin problema pa crea un instancia pa analisa y duna conseho financiero riba presupuesto. Pero nos no tabata kier loke nos a wak cu a sosode na Corsow. Nos a bisa for di comienso cu nos kier analisis critico pero balansa. Analisisi y conseho cu no solamente ta bisa kico por bay malo, pero tambe mustra con si por logra metanan financiero di gobernacion y cua otro oportunidadnan tin. E critica di fraccion di AVP no a wordo scucha. E ultimo raportahe di CAFT ta un indicacion di esey. E ta un raportahe lamentabelmente desbalansa, incompleto y parcial. AVP lo usa e critica unda e ta realistico y añadi su propio analisis, optimismo y trabou duru, cu a saca Aruba for di e crisis cu MEP a bay laga Aruba cun'e.

RIESGO vs BENTAHA
Den su raportahe CAFT ta menciona riesgonan manera e impacto di e financiamento di e apertura di e refineria di CITGO y e impacto riba medio ambiente. Ta papia di e riesgo di deficit di AZV den 2016 y calculacionnan cu nan ta yama irealistico atrobe pa 2017. Pero niun caminda CAFT ta indica con miho pa uza e entradanan nobo di e apertura di e refineria. Niun caminda CAFT ta menciona e probabel aumento di belasting door di cu mas hende ta bay cobra un salario y gasta esaki den economia di Aruba. Atrobe CAFT ta bisa cu cifranan den presupuesto ta irealistico. Nos ta corda cu for di 2014 CAF/CAFT a cualifica e presupuestonan di gobierno di AVP irealistico, pero cada biaha nan no tabata tin rason! E deficit cu nan a critica tanto na 2014 pasobra e inverti 180 miyon pa salba e fondo di pensioen, a wordo reduci den tres aña for di 9.4% te bou di 2%. Esaki tampoco nan a spera. Anto a haci'e completamente riba nos propio forsa y sin tuma medida!

AVP den Parlamento kier tin bon control riba finansa publico, pero tambe kier wak nos pais y nos hendenan progresa. Pesey AVP a papia semper di un maneho balansa cu ta sigura cu placa di pueblo ta yega na pueblo y cu finansa publico no ta causa problema pa nos pais. Pero net lo contrario: e ta un recurso di progreso y bienestar pa henter nos pais. Esey ta loke a y lo sigui sosode. E raportahe di CAFT no ta niun indicacion di esey.

Expresionnan haci den e articulo aki no necesariamente ta refleha opinion di ArenaPoliti.co