ORANJESTAD – Prome Minister Mike Eman a hiba palabra dialuna mainta na apertura di training inaugural riba Desaroyo Sostenibel ofreci pa United Nations Development Programme (UNDP) conhuntamente cu Center for Excellence (CoE) di Aruba enfoka riba Small Island Development States (SIDS) e siman aki na Aruba. E encuentro ta duna inicio na e 'Green Week of Sustainable Initiatives' cu ta inclui e di 7 edicion di Green Conference.  

Center For Excellence ta un plataforma cu ta presenta hopi idea nobo riba tereno di innovacion, energia alternativo y sostenibilidad. Cu sostenibilidad ta referi na e sentido mas amplio di palabra; kiermen, no solamente energia, pero un desaroyo economico, un reparticion husto di entrada, calidad di bida di e hendenan. “Pa kita discrepancia di e economia cu ta ser mira solamente for di e punto di bista crecemento di producto bruto nacional, pa un economia cu un conexion mas fuerte entre prosperidad economico y progreso social,” asina Premier Eman a splica. 

“Na Aruba esaki ta nifica no solamente hotelnan di cinco strea, pero tambe barionan di cinco strea, scolnan di cinco strea, un entrada mas husto pa nos hendenan, espacionan publico di calidad, bon infrastructura y cuido di nos grandinan y di nos enfermonan. E aspectonan aki pon’i den un contexto mas integral, ta algo cu Aruba a bin ta pone riba agenda internacionalmente.” 

Gabinete Mike Eman ta conkistando mas atencion y admiracion pa su vision y tambe mas colaboracion cerca institutonan grandi cu ta sinti cu esaki ta e direccion cu mundo tin cu bay, esta cu enfasis riba e 'Human Index' y no e GDP index. E ta resalta, den maneho di e Gobierno aki, cu ehempelnan manera panel solar riba scol y edificionan publico, reduccion di tarifa pa auto electrico, pero tambe den renobacion di barionan, iluminacion eficiente pa barionan, dialogo social, tur ta forma parti di e vision di sostenibilidad.

Minister President a indica cu a pesar di ta un isla chikito cu recursonan limita, Aruba a demostra un consistencia den e articulacion y ehecucion di su vision. Esey ta pone cu institutonan internacional manera Nacionnan Uni kier bira socio cu Aruba pa demostra cu un practica exitoso riba un isla ta alcansabel.

A base di esey, aña pasa a nace e 'Center for Excellence' na Aruba pa acumula y comparti e ‘best practices’ cu otro islanan pa medio di diferente formula, entre nan digital, pero tambe sesionnan caminda representantenan ta bin hunto pa intercambia idea y experiencia. E idea ta pa tur SIDS hunto por progresa y yega hunto na e metanan; e 19 Sustainable Development Goals cu Nacionnan Uni a adopta.

“Nos ta hopi orguyoso di por demostra e exitonan aki, ademas di e retonan,” asina Premier Eman a bisa. Dos ehempel di reto ta e molina di biento dor di casonan den corte y tambe e planta di gas for di sushi a sufri tardanza dor di e tecnologia avansa. “Hunto e experiencianan positivo y esnan dificil cu bo ta ta intercambia cu otro, ta haci nos tur mas fuerte pa enfrenta e bunita meta cu nos tin pa nos tur avansa riba e Sustainable Development Goals (SDG's) y Aruba ta hungando un rol hopi importante den esey y nos por ta orguyoso paso no solamente nos ta bis’e pero mundo ta bis’e demostrando cu a pesar di tin nos propio retonan, nos curason ta na e bon luga y e esfuersonan tambe ta na e bon luga.”

Expresionnan haci den e articulo aki no necesariamente ta refleha opinion di ArenaPoliti.co