Prome Minister despues di su reunion cu Gobernador. 
Mr. drs. Richard Arends ta bira Minister di Economia nobo. 

ORANJESTAD - Dialuna mainta 11or, Prome Minister Mike Eman tabata na oficina di Gabinete di Gobernador di Aruba pa informa gobernador di e dos ministernan nobo cu ta uni nan mes na Gabinete Mike Eman II. Manera ta conoci caba ex-minister di Finansas, Juan David Yrausquin a tuma na su encargo responsabilidadnan di Minister Plenipotenciario na Hulanda. 

Como cu a bin un posicion vacante den Gabinete Mike Eman II, cu retiro di minister di Turismo, a cuminsa tambe e proceso pa un remplasante. Den e caso aki a opta pa ing. Mike de Meza tuma e responsabilidadnan como Minister di Turismo, mientras cu mr. drs. Richard Arends ta tuma trabounan di Minister di Economia over. Sr. Arends ta un consehero trahando tanto cu Minister di Economia de Meza y tambe Prome Minister Eman. Sr. Arends tabata presidente di e 'Think Tank' Fundacion Estudionan Social Cristian pa basta aña. 

Prome Minister na salida di su reunion cu Gobernador, hunto cu secretario suplente di Conseho di Minister Zulema Dabian-Erasmus, a splica di ta contento con e proceso a bay y a splica cu e proceso tabata uno hopi extenso como cu un candidato pa minister di hopi rekisito cu e mester cumpli cu ne. "Cada un di e procesonan aki ta tuma su tempo y tabata tin hopi speculacion, pero simplemente nos tabata bezig den e proceso aki y diabierna nos a completa e proceso aki pa e dos candidatonan aki. Awe mi por a entrega na Gobernador e documentonan positivo di e instancianan cu ta traha riba e proceso referente na e dos personanan aki y declaracionnan cu e personanan aki ta duna riba un serie di pregunta cu a wordo haci na nan."

E proceso cu ta sigui ta cay bou responsabilidad di Gabinete di Gobernador di Aruba y ora cu esey ta cla por sigui cu e nombracionnan. "Nos ta sumamente orguyoso, di e dos personanan aki y hopi contento tambe cu e proceso a cana rapido y cu nos por a cumpli cu nos comunidad pa awe pone e gabinete completo," Prome Minister Eman a enfatisa.

Expresionnan haci den e articulo aki no necesariamente ta refleha opinion di ArenaPoliti.co