Parlamentario Xiomara Ruiz-Maduro (MEP): Minister Schwengle cu ofensa pa esnan cu ta busca “second opinion” den exterior
E ta hopi lamentabel pa a scucha con Minister Schwengle a expresa su mes den sala di Parlamento na momento di contesta preguntanan haci na su persona cu ta toca nos salubridad publico.
Nos a keda sigur basta babuca di tende con e mandatario aki a expresa su mes di hende cu ta busca un “second opinion”.
Aki nos ta referi na e manera cu Minister Schwengle a scohe pa sugeri cu na Aruba tin hende cu kier bay tuma baño di vicks na La Guajira como un segundo opinion riba nan situacion medico. Nos ta lamenta tal exprecion di e mandatario.
E Minister ta insulta e inteligencia di nos Pueblo y e mes como mandatario encarga cu nos salud ta chercha y bagatalisa y haci mofa di nos cuido medico.
Banda di esaki pa expresa su mes asina denigrante di e conocemento medico di e Pueblo di La Guajira ta inaceptabel.
E Minister ta habri caminda asina pa hende pensa cu e cuido medico eynan ta asina fatal cu ta cu vicks so nan por cura hende. Un falta di respet grandi pa e Pueblo indigena cu ta conoci pa uso di remedi natural.
Na nos opinion Minister Schwengle no tabata tin ningun necesidad pa recuri na tanto arogancia y ofensa pa trece su punto dilanti. E mandatario por a djies bisa cu tur hende tin derecho pa un second opinion y cu no ta tur tratamento of na tur Pais, AZV ta cubri e gastonan.
Di e manera aki por a brinda un bon splicacion sin cu mester a bay na insulta e inteligencia di nos Pueblo of ofende e Pueblo indigena di La Guajira innecesariamente.
Expresionnan haci den e articulo aki no necesariamente ta refleha opinion di ArenaPoliti.co