E ruinasnan di Ex Bushiri Hotel tin number y fam, AVP y Otmar Oduber. Hunto nan a haci e promesa na e pueblo aki cu manera cu nan drenta den gobierno, cual ja caba ta casi 8 anja pasa nan e ruinasnan aki lo ta pa pasado. Awe e situacion ta mucho mas peor, e lugar a bira un shelter pa addictonan ambulante y esaki ta un di e promer impression cu un turista ta haya ora e yega nos pais. Ki impression nos ta duna e turista ora e ta pasa dilanto e ruinas nan aki? Pa 7 anja largo AVP y Otmar Oduber NO a haci nada pa trece cambio den esaki. Nan a presenta net promer cu eleccion na anja 2013 un proyecto fantasma cu for di comienza caba por a anticipa cu nunca lo mira lus di dia. Nos di MEP a informa nos pueblo caba cu nos lo kier mira un solucion mas pronto posibel pa e area aki cua ta un beachfront y un beach sumamente bunita cu por wordo drecha y mehora. Nos ta kere den un desaroyo turistico pa e area aki pero manera nos a bisa un desaroyo di un hotel estilo Boutique Hotel pa nos por atrae di berdad e turistanan cu ta gasta hopi placa den nos economia. Den parlamento di Aruba un mocion a wordo aporba for di masha tempo pa urgi gobierno pa benta e edificio aki di Ex Bushiri Hotel abpou mirando e mal imagen cu esaki ta crea serca nos bishitantenan. Te dia di awe cu falta apenas 10 luna pa e eleccion gobierno di AVP NO a duna oido na e mocion aki y ta parce cu nan NO ta tin respet pa parlamento y no ta haci absolutamente nada cu e mocionan cu ta wordo aproba den parlamento. Nan mes ta falta respet pa nan mes pasobra ta fraccion di AVP mes a presenta e mocion aki cu te dia di awe e no a wordo honra. Kiko gobierno ta warda nos no tin ningun idea pero hecho ta cu dia pa dia e situacion ta birando peor y tin hopi turista ta comentando esaki caba indicando e deterorio di nos pais. No solamente tin Ex Bushiri Hotel sino tambe John F Kennedy School cu gobierno a laga den un estado di decadencia sin cu a haci nada alrespecto.

E negligencia di e gobierno aki ta bisto y ta obvio cu nan tin prioridadnan completamente robez. No por ta asina cu parlamento ta aproba un mocion y ta urgi gobierno pa tuma accion y parlamento di Aruba no ta haya oido ni e respet cu e merece. Esaki ta pasa ora un gobierno ta kere cu e por haci y deshaci cu e mandato cu e pueblo a duna nan. Nos pais no merece di ta wordo goberna pa un grupo di hende irresponsbel cu ta pone nan interes y interes di nan amigonan como prioridad. Nos pais no a conoce ningun desaroyo di 5 strea e ultimo 7 anjanan aki y no a conoce un mihor producto turistico. E ruinasnan di Ex Bushir Hotel ta muestra y ta ilustra con nos pais a wordo goberna e ultimo anjanan aki.

Dentro di corto nos lo presenta un plan completo cu e solucion cu nos di MEP tin pa e area aki caminda sigur lo ta un desaroyo combina caminda pueblo tambe lo ta participe na dje. Nos ta exigi di gobierno pa tuma accion y benta e edificio aki abou pa asina evita e mal impression cu turistanan ta hayando! 

Expresionnan haci den e articulo aki no necesariamente ta refleha opinion di ArenaPoliti.co