ORANJESTAD – Decisionnan robes di Minister di Turismo y Prome Minister di MEP a pone cu Pais Aruba a paga 20 miyon Florin pa un hotel cu nan a prefera di lag’e bira un ruina. Awe pueblo mester paga e gastonan atrobe di e mal maneho ey dor di laga basha e edificio abou y asina por haci algo productivo cune. “Over my dead body’ ta loke Premier Nelson Oduber a bisa un hotelero exitoso cu kier a cumpra e hotel aki, sentenciando e propiedad na su fin.

Entre e diferente personanan cu tabata diaranson mainta den cercania di Bushiri Hotel, tabata Alonso Geerman, kende den prome decada di e siglo aki tabata fungi como President di fundacion Aruba Hospitality And Training Center. Esaki tabata e entidad encarga cu operacion di e hotel y e tambe e scol di hoteleria.

Geerman a conta cu for di su construccion e hotel no tabata cumpli cu e regulacionnan pa loke ta trata con un edificio pa preveni y prepara pa caso di candela. Esaki a pone cu Cuerpo di Bombero a keur e af y consecuentemente seguro a nenga pa cera un polisa afectando gravemente un posibel operacion.

Directiva di e fundacion a acudi na Gobierno cu a conseha pa acerca banco cu un plan pa financiamento pa e ahustenan necesario manera instalacion di ‘sprinkler system’ entre otro  y cubri e perdida mientras cu e trabou ta wordo haci y no ta den operacion. A logra haci esaki cu e meta cu un bes cu tur cos ta na ordo, lo busca un cumprador y asina ey cubri e fiansa na banco.

Un di e prome stapnan tabata pa separa e scol for di hotel, un proceso cu a cana bou guia di Minister di Enseñansa di e tempo ey, Eddy Croes. Asina a hinca e ‘hotelvakschool’ manera tabata conoci den pueblo, bou di e capa di EPI scapando e oportunidad di estudio den hoteleria na Aruba, cual awendia ta un facultad grandi riba nos isla.

Geerman a conta cu, un bes tur cos tabata cla, a bay over na busca benta pa Bushiri Hotel. E conocido hotelero, propietario di entre otro Holiday Inn Aruba, Alfredo Lowenstein a haci un oferta di 13 miyon Florin. Den reunion cu Minister di Turismo di e tempo ey, Eddie Briesen y Premier Oduber, negociacionnan rapidamente a tuma un direccion robes. A yega na e punto cu a surgi un discusion for di cual Oduber a bandona e sala bisando Lowenstein cu “Over My Dead Body’ e lo bende su persona e hotel.

“Desde e tempo ey e hotel a keda para te awe y caba den un ruina; mientras cu tabatin un bon cumprado!” Geerman a bisa, añadiendo cu “E hotel aki, mi ta bay bisa berdad, ta costa pueblo hopi placa. E Gobierno di MEP no a paga e debe na banco y el a crece te na mas di 20 miyon Florin cual debe nan a paga ora a bende Plant N.V.”  

Awe Gobierno di AVP ta bolter e rumbo di historia y ta destina e tereno aki pa uszo bek di tur ciudadano y bishitante di Aruba. Un biaha mas, AVP ta coregi e foutnan di pasado y ta recupera e patrimonionan di nos isla cu un vision mas positivo y productivo. 

Expresionnan haci den e articulo aki no necesariamente ta refleha opinion di ArenaPoliti.co