Na Aruba ora mayoria persona den comunidad scucha cu un abuso di menor di edad a tuma lugar mesora tur ta grita pa castiga e pedofil !!
Pero abo a yega di puntra bo mes kico of ken enrealidad ta un pedofil ???
Tur pedofil ta un abusador di un menor di edad ???
Tin dos parti di e tematica cu hopi di nos no tin e conocemento di dje cu ta e terminologia medico y juridico.  

Conocemento ta poder y esaki nos por usa pa defende y proteha nos yiunan menor di edad. Segun investigacion internacional 1% di e poblacion di e ser masculino na mundo tin e preferencia sexual aki. Ta existi pedofilia den e poblacion femenina tambe pero esaki no tin mucho informacion riba dje.

Tambe tin 4 terminonologia cu hopi persona den nos comunidad no tin conocemento di dje y kico ta e diferencia e.o.: pedofil, efebofil, pedosexual y efebosexual. Esaki ta importante pa educa nos comunidad riba dje pa comunidad por compronde e tematica den su aspecto medico y juridico den un forma basico.

E parti medico segun Diagnostic and Statistical Manual of Mental Disorders (DSM 5),

• Pedofil ta un persona adulto cu tin atraccion sexual pa un menor di edad cu no tin caracteristica sexual secundario ( no tin desaroyo di pecho, vos, cabei pubico etc). Mayoria biaha un pedofil tin atracion sexual pa un menor di 0 te cu 13 aña pero e por tin atraccion sexual pa un adulto tambe. 
• Efebofil ta un persona adulto cu tin atraccion sexual pa un menor di edad cu tin caracteristica sexual secundario ( tin desaroyo di pecho, vos, cabei pubico etc). Mayoria biaha un efebofil tin atraccion sexual pa un menor di 13 aña te cu 16 aña pero e por tin atraccion sexual pa un adulto tambe.

Un persona cu ta pedofil of efebofil riba su mes no ta castigabel pa nos codigo penal y hopi por biba cu esey sin comete un acto di abuso contra un menor. No necesariamente e personanan aki ta usa material pornografico infantil manera teksto, fotografia of video. Nan por djis keda te na un atraccion sexual so.

Hopi di e personanan aki no sa mes cu nan ta un pedofil of efebofil pa varios motibo y tin cu si ta altanto di esaki pero por hiba un bida normal.
Pero nos tin un problema serio na momento cu e pedofil of efebofil aki bai over na e conducta y acto sexual castigabel. E ora e pedofil ta pasa y bira un Pedosexual y e efebofil ta pasa y bira Efebosexsual. Y e esei ta castigabel.
Den otro palabra un headline di noticia mester ta p.e. “E Pedosexual a wordo condena na 10 aña di prison” !!

E parti juridico stipula den nos codigo penal no ta menciona nada di pedofil of efebofil sino discripcion di un conducta y acto sexual cu un menor di edad cu ta castigabel. Akinan nos ta papia di un persona cu nos por categorisa su conducta y acto sexual castigabel como un pedosexual y efebosexual.

Como cu nos ta bibando den un cultura di machismo na Aruba hopi persona den nos comunidad no ta reconose un conducta of acto sexual castigabel di un efebosexual. Hopi persona den nos comunidad ta hasta normalisa conciente of inconcientemente e conducta y acto sexual di un efebosexual. Esaki ta peligroso pasobra e ta expone nos menor di edad na un mentalidad y cultura negativo. 

• Cuanto biaha nos ta lesa den medio di comunicacion informacion di embaraso hubenil?
• Abo a yega di lesa e informacion ken ta e tatanan?
• A base di e diferencia di edad y situacion social cuanto lo por wordo categorisa como un efebosexual?
• Nan a wordo deteni pa tene relacion sexual cu un menor di edad ?

Corda cu efebosexual ta homber y muhernan paso mi ta sigur cu nos tin casonan di pedosexual y efebosexual femenino tambe na Aruba pero esei ta un taboo.
E ta ser normalisa y nos no ta lesa nada di esaki den medio di comunicacion.
Pa mas informacion educativo mi kier recomenda nos comunidad pa subi riba e website https://stopitnow.be/faq

Conhuntamente nos por trece hopi mas cambio den nos sistema pa frena abuso di menor na Aruba y duna e causa e respet y prioridad cu e merece na bienestar di nos yiunan y comunidad henter.

#StopAbusoDiMenorAruba

Expresionnan haci den e articulo aki no necesariamente ta refleha opinion di ArenaPoliti.co