E instituto di supervision financiero CFT a remarca den su evaluacion riba e presupuesto 2015 cu e medidanan proponi door di Gabinete Eman (basa riba nan balanced budget accoord) ta carece (falta) di tanto splicacion y e calculacionnan corespondiente  p’asina substancia con lo logra implementa esakinan den e presupuesto.

Sugerencia di CFT
CFT a enfatisa cu ta di sumo importancia pa ehecuta e presupuesto na un bon manera y stipula cierto fechanan ora cu esaki mester wordo adapta. Den cuadro di esaki CFT a sugeri cu reportahenan (di presupuesto) mester sosode riba un base regular na Parlamento p’asina tin un bista di e desaroyo y implementacion di e medidanan proponi door di Gabinete Eman ta tumando lugar. E ta di suma importancia pa por wak e efectonan cu e medidanan aki lo tin den e presupuesto 2015. Mester subraya cu no solamente e trahamento di e presupuesto ta importante pero tambe e ehecucion y e parti monitor di esaki.

Dunamento di cuenta
E ta un hecho cu dunamento di cuenta riba e status di ehecucion di e presupuesto riba un base periodico (fechanan specifico) ta indispensabel y lo tin su balor agrega p’asina tin un proceso presupuestario decente. Pa tin un mihor proceso e  instituto di supervision a propone tambe pa gobierno por duna reportahe di e presupuesto na Parlamento di Aruba si ta posibel cada pasa 3 luna. Den e reportahenan aki lo mester bay duna un bista di progreso di e medidanan imponi p’asina por logra ehecuta ahustacionnan na tempo si esaki ta necesario. Ademas di loke a menciona caba, CFT a recomenda cu por lo menos 2 biaha pa aña (dunando lunanan di april y oktober como ehempel) lo por papia di un “begrotingswijziging” (adaptacion di e presupuesto).

Disciplina di gobierno
Mas aleu e instancia a categorisa e manera con Gabinete Eman a trata e presupuesto 2014 te na luna di december como uno “not making sense” y cu esaki a pone un limitacion na Parlamento su “budgetrecht”.  E ultimo aki fraccion di MEP a bin ta señalando for di tempo cu Gabinete Eman a tuma mando pasobra semper nan tawata laat cu e presupuesto y no tawata sigui e proceso presupuestario manera mester ta y conforme e leynan corespondiente.  Remarcabel ta e hecho cu organonan di conseho local manera RVA y Algemene rekenkamer semper riba un base di repetitivo a señala cu gobierno lo ta violando reglanan di comptabilidad. Loke bo por conclui ta cu si Gabinete Eman no tin disciplina cu e proceso presupuestario esaki lo por tin mas consecuencia riba loke tin caba. 

Expresionnan haci den e articulo aki no necesariamente ta refleha opinion di ArenaPoliti.co