Comienso di siman minister di finansas sr. Bermudez a informa cu probablemente parlamento di Aruba lo haya e presupuesto 2015 e fin di e luna aki pa asina e por wordo trata. Segun reglanan y ley stipula (staatsregeling) e presupuesto di 2015 lo mester a wordo entrega no mas tarda cu 1 september di e aña 2014 na parlamento. Den e caso aki  Gabinete Eman ta demostra un biaha mas cu e ta para riba ley y ta hasi kiko cu e kier. Ta di lamenta si cu para bira un custumber cu e gobierno aki no kier tin disciplina presupuestario y ta sigui kibra regla. 

Segun minister Bermudez e presupuesto 2015 no lo inclui ningun aumento di impuesto. Remarcabel ta e hecho cu e meerjarenplan original di 2014 a wordo ahusta pa 2015. Ora di compara esakinan bo lo nota cu e medidanan pa baha gasto a wordo aumenta cu 10.5 miyon florin dus di 270.9 miyon pa 281.4 miyon. Mas aleu bo por constata na e cifranan cu a pospone e introduccion di e financial transfer tax pa aña 2016 pasobra den e meerjarenraming esaki tawata presupuesta pa genera 12 miyon florin den aña 2015. Otro punto cu a resalta ta cu lo corta un suma di 35 miyon na inversionan enbes di 11.3 miyon.

Tambe e la indica cu e maneho actual ta basa riba meerjarenplan cu a entrega hunto cu e presupuesto di 2014 cual lo tawata un recomendacion di CFT. Pa clarifica e meerjarenplan cu e minister ta referi na dje no ta un recomendacion di CFT. E declaracion aki ta duna e impreshon cu sea a lubida of a ignora e hecho cu Rijksministerraad (gobierno di Reino) a wordo acerca door di Aruba januari 2014 cu un peticion pa haya aprobacion pa por bay haci un prestamo den exterior. RMR a pone 3 condicion cual un di nan tawata entrega di presupuesto 2014 prome cu 1 mei 2014 incluyendo un meerjarenraming tawata un di nan. Na un promer instante gobierno su meerjarenraming tawata hopi "summier" y no a cumpli na suministra uno manera debe ser. Te ora cu CFT a controla e promer presupuesto 2014 Gabinete Eman a bai incorpora un meerjarenraming mas detaya den e presupuesto ahusta pa 2014.

E hecho cu e presupuesto 2015 ta wordo entrega 7 luna laat ( mescos cu presupuestonan di añanan 2011-2014) ta refleha cu gobierno di AVP no conoce disciplina, ta negligente y irresponsabel cu nos finansas publico pa no atene su mes na regla y leynan scirbi. Loke ta regarda e meerjarenraming y e medidanan incorpora den presupuesto pueblo mester ta bon informa cu esaki ta compilacion di Gabinete Eman relaciona cu nan propio plan pa por yega na un balanced budget. Promer cu finalisa ta importante pa remarca cu AVP a hasi un promesa den campaña cu e lo ta responsabel cu nos finansas publico pero atrobe a demostra cu no ta tur cos cu ta briya ta di oro! 

Expresionnan haci den e articulo aki no necesariamente ta refleha opinion di ArenaPoliti.co