E periodo di 5 aña di gobernacion di Gabinete Eman ta mustra claramente cu desde inicio di su mandato a dirigi su mes pa gasta placa sin control y crea debe pa nos pais.Gastamento sin control awe a pone cu nos pais tin e dilemma financiero mas grandi cu nos a yega di conoce desde 1986. CFT como organo di supervision financiero a confirma e dilemma y indica cu Trece ordo den nos finansas publico sigur ta un di e retonan mas grandi cu Aruba a yega di conoce y cu mester compromise pa logra esaki.

Cifranan ta mustra cu nos deficit a crece substancialmente e ultimo 4 añanan y cu a gasta mas placa cu nos pais tin. E averahe di e deficit registra entre e periodo 2011 -2014 ta 8.4% di nos product domestico bruto ( GDP) cual ta marca record. Consecuentemente debe di gobierno a conoce un aumento drastico den e ultimo añanan. Den un charla teni CFT a enfatisa riba e hecho cu na 2008 e debe nacional di Aruba ainda tawata alrededor di 40% y no a dura mucho cu na man di Gabinete eman a surpasa nivel di debe di Hulanda y desde e tempo Aruba tin e nivel di debe mas halto den Reino Hulandes (80.7% na fin di 2014)  

Pa bai mas den detayes ta importante pa subraya cu gastonan di gobierno a conoce un aumento di 21.5% entre 2009 y 2014 mientras cu entrada di gobierno a crece cu solamente 12.5%. Ademas di esaki e ta importante pa remarca cu den e periodo aki gastonan relaciona cu empleadonan publico a subi drasticamente cu 20% door di a tuma mas empleado den aparato gubernamental. Banda di gastonan operacional y di personal gastonan di interes riba debe di gobierno tambe a conoce un aumento di 50% den mesun periodo conbertiendo su mes un parti grandi di e problema.

Hopi importante ta pa remarca cu e Gabinete Eman nunca kier a lead by example pasobra ora di a sinta caba a crea 2 ministerio extra! Akinan bo ta haya e impreshon caba cu nan enfoke tawata mas na material , faborece y enrikese 2 persona cu kier a bira minister. Pero no ta akinan so a cuminsa ta gasta placa sino den diferente otro tipo di gastonan coordinador, promotion, huur, consultants, biahe y asina e lista ta sigui. Hecho ta cu e maneho financiero hiba den e ultimo 5 anjanan tawata un desproporcional y a logra cu awendia cu medidanan ta rekeri pa salba finansas di nos pais. Ta obvio cu esaki ta indica e falta di vision, iresponsabilidad y incapacidad den e maneho financiero pa nos pais. Pueblo por conclui cu e desaroyo di nos deficit presupuestario di ultimo añanan ta prueba cla cu Gabinete Eman a gasta placa di pueblo sin control!

Expresionnan haci den e articulo aki no necesariamente ta refleha opinion di ArenaPoliti.co