Durante campaña pa eleccion 2009 partido AVP a priminti pueblo cu – asina cu nan drenta gobierno – nan lo elimina e BBO di 3%, ya cu segun nan, esaki ta e causante principal di aumento di costo di bida na Aruba. Sinembargo te cu awe nan no a cumpli cu nan promesa di campaña, esta di elimina e BBO completamente. Lo unico cu nan a haci tabata reduci e BBO cu 1.5% y pa despues di 4 aña nan bolbe aumenta esaki cu 1 porciento mediante e Health Tax pa AZV. Pero e poder di compra di nos ciudadanonan a sigui bay mas atras: Durante e mas di 5 aña di Gabinete Mike Eman ningun producto y articulo den tiendanan a mira un reduccion den prijs, pero a conoce solamente aumentonan drastico.

Fuera di kitamento di e 3% di BBO, un di e promesa y mentiranan di mas grandi cu AVP a lansa durante campaña pa eleccion 2009 tabata cu ‘from day one’ nan lo reduci e tarifanan di awa y coriente cu 25.5% y den e siguiente aña nan lo reduci esaki cu un otro 25.5%. Pues en total un reduccion di 51%! Pa demonstra con grandi e mentira y manipulacion di AVP ta, partido MEP ta produci e tabel adhunto caminda nos por mira e desaroyo den e prijs di coriente for di October 2009, esta e luna cu MEP a bandona gobernacion te cu Januari 2015 den cual AVP ta na mando. Nos por mira claramente cu e prijs di coriente a aumenta drasticamente cu 14.4% durante e ultimo 5 añanan. Hecho ta cu pa un parti e aumento drastico aki ta debi tambe na e forma con e hedging di e prijs di heavy fuel oil a tuma lugar caminda e gobernantenan iresponsabel di AVP a cera un contract cuestionabel di hedging y cu awe esaki ta perhudicando henter nos pueblo. Sinembargo te cu awe ningun ministro di Gabinete Eman kier mustra nan cara den henter e asunto aki, nan no kier duna Parlamento e contract di hedging y riba dje nan no kier trece e investigacion riba e echonan (‘feitenonderzoek) den e asunto di hedging riba mesa pa pueblo haya sa kico a pasa. Tur esaki ta mustra cla y raspa cu tin hopi cos di sconde den henter e asunto di hedging y consecuentemente e aumento drastico di prijs di coriente.

Mientras tanto e pueblo Arubano mes desde October 2014 a keda crucifica cu e aumento barbaro di prijs di coriente y pa cual te cu awe Promer Ministro Mike Eman no kier mustra cara, tuma su responsabilidad y trece alivio pa henter comunidad pa loke ta e prijs di coriente.

Expresionnan haci den e articulo aki no necesariamente ta refleha opinion di ArenaPoliti.co