Folkore di Aruba a wordo salvaguardia pa futuro generacionnan 

Diasabra anochi Minister di Cultura Otmar Oduber a organisa un anochi special pa presenta e produccion final di e proyecto Resona. 

Minister Oduber a splica cu e proyecto Resona ta hopi importante pa Aruba su Cultura, unda por medio di e proyecto aki lo laga e musica resona cu mester wordo transmiti y carga pa un generacion nobo, pa asina aki keda mantene e historia y e parti cultural di folkore bibo.
E mandatario a indica di ta sumamente satisfecho cu e desaroyo y producto final di e proyecto aki, mas aun despues cu el a experencia e ensayonan na scol di musica diasabra atardi y a mira e producto y presentacion. 
'Resona ta un proyecto cu a inicia despues cu mi a experencia dos presentacion como e Minister di Cultura, unda cu Datapanic a presenta e tempo ey cancionnan di antes pa cual Vicente Ras tabata parti di e show ey y tambe Carlos Bislip hunto cu Muziekschool a presenta musica di antaño y cu esaki a nace e idea pa cuminsa cu un proyecto cu lo yuda na educa, conserva y traspasa folklore di Aruba di un generacion pa e otro cu lo mester ta esnan cu lo bay caraga esaki,' e mandatario a bisa. 
Resona ta e prome proyecto unda a scohe 13 cancion di antes, cantica di nos grandinan cu no ta wordo hopi toca mas na radio emisoranan, pasobra nan ta zona malo dor di e produccion ta uno di sistema bieu.Cu e proyecto aki a hincanan den un bachi nobo y den un produccion di calidad halto
E proyecto aki a conta cu sosten di 17 artista, musico y cantante local di e generacion nobo cu ta interpreta e cancionnan imortal aki.

Durante e evento exclucsivo pa prensa y locutornan di Aruba, a presenta tambe parti di e documentario y entrevista cu e diferente artistanan cu a brasa e proyecto aki grandemente. 
Pa Minister di Cultura e tabata un momento emocional, mirando cu a cuminsa cu e proyecto aki cu e stimacion pa e musica, pero awor cu ta mira e union di e musiconan, esnan cu ta toca e diferente instrumentonan y e cantantrnan con nan a cera cu otro pa asina aki brinda nos cultura e oportunidad pa wordo rebiba. 
E entusiasmo di cada un cu a aporta cu e proyecto aki y ta traha duro pa haci di e presentacion final dia 16 di maart den Cas di Cultura un exito ta grandi. 
 Prome cu esaki lo tuma lugar 4 dia di presentacion special pa diferente scol rond di Aruba y asina aki ceranan conoci cu full e proceso, documentario y produccion final. Importancia di e presentacionnan aki ta pa crea e momento di traspaso di cultura pa e grupo di hobennan aki.

Expresionnan haci den e articulo aki no necesariamente ta refleha opinion di ArenaPoliti.co