Glenbert Croes (MEP): Gobierno di AVP ta fayando CITGO p’esey e inversionnan no por cuminsa
Relaciona na e noticia cu dicon CITGO Aruba, CITGO y PDVSA te ainda no a cuminsa cu e inversionnan na Aruba den e refineria, Sr Glenbert Croes ta bisa cu esaki ta pasobra cu Gobierno di AVP ta fayando CITGO. Sr Croes ta elabora riba esaki:
“Gobierno den marco di e acuerdonan firma a priminti e pakete di incentivonan y te ainda esakinan no a wordo finalisa. Mientras cu CITGO tin e placa pa haci e inversionnan den e refineria pero ta Gabinete Mike Eman 2 mes ta retrasando e trabaonan pa nan cuminsa.
E pregunta ta pakico ta Gobierno ta retrasando CITGO pa cuminsa cu e inversionnan den nos refineria? Pasobra tin 3 Ministro cu interes personal den e refineria cu kier sigura cu nan companianan haya e trabaonan cu nan mester haya pa trece trahadornan di afo Aruba. Envez cu e 3 Ministronan aki di Aruba mester ta bringando pa nos trahadornan local y contratistanan local haya trabao den e refineria, e 3 Ministronan aki di Aruba ta bringando pa nan interes personal den e refineria wordo atendi.
P’esey ora a drenta e noticia dicon Ministro Mike De Meza y Ministro Paul Croes a bay Venezuela referente e proyecto di gas, tur hende a puntra nan mes: pero acuerdonan referente e proyecto di gas ta firma caba entre Gobierno di Aruba y Gobierno di Venezuela.
Kico e dos Ministronan aki tin di bay mete den e asunto di e proyecto di gas? E contesta ta: nan kier hinca nan curpa den e proyecto di gas tambe mescos cu nan a hinca nan curpa den e proyecto di e refineria.
Apesar cu hopi biaha mi por ta critico cu CITGO y PDVSA, awe mi ta tuma parti pa CITGO Y PDVSA contra Gabinete Mike Eman exigiendo Gobierno di AVP pa finalisa e pakete di incentivonan pa e inversionannan por cuminsa, pero alavez urgiendo gobierno pa sigura cu tur e contratistanan sigur e contratistanan local tambe bin na remarca pa e incentivonan aki.
Pasobra ora e cu e refineria a cera ta e contratistanan local a pasa momentonan sumamente dificil y awor nan tambe merece un “break” pa asina tur por para bek riba pia,” Sr Croes ta termina bisando.
Expresionnan haci den e articulo aki no necesariamente ta refleha opinion di ArenaPoliti.co