Dialuna 12 juni a cuminsa reunionnan tripartiet na Hulanda entre e parlamentonan di Aruba, Curacao y Sint Maarten. Despues den siman tin reunionnan conosi como IPKO den cual parlamentonan di Hulanda tambe ta participa.
Durante e reunionnan aki ta trata temanan di interes comun entre e islanan.

PENSIOEN DI BIEHES DI SVB CURACAO 
Fin di aña pasa SVB di Curacao a informa tur pensionado cu ta biba na Aruba, cu lo corta nan pensioen cu 10% y ademas nan lo perde e kerstbonus. Un decision cu a afecta e pensionado na Aruba severamente.
"Na Cede di MEP mi ta atende hopi pensionado tur siman, y mi por a constata cu e problema aki ta serio na Aruba tambe. Mi a purba atende e tema aki cu gobierno di Curacao pero nan a referi na Gobierno di Aruba cu mester atende e tema aki. Lamentablemente sr. Mike Eman no a mustra ningun interes pa atende esaki. Pues awor mi lo trese e punto aki dilanti cu Parlamento di Curacao durante e encuentronan Tripartiet", Evelyn Wever-Croes a duna di conose.

INTEGRIDAD 
Integridad ta un tema cu lo wordo trata durante e reunion tripartiet y durante IPKO mirando cu e topico aki ta hopi halto riba agenda di Reino. "Di nos parti nos ta prepara pa lucha pa nos no perde e autonomia cu nos tin riba e tereno aki, apesar cu nos tin un gobierno cu no ta interesa su mes mucho pa e tema aki. Dos siman pasa den Parlamento nos por a constata con gobierno di AVP en bes di traha un ley pa combati corupcion, a traha un ley pa acomoda corupcion. Hulanda a avisa nos caba cu nan lo interferi si Aruba no tuma pasonan necesario. MEP a presenta un nota ya caba desde 2014, y a adapta esaki na 2015 den cual ta stipula e caminda cu mester cana pa Aruba tambe tin leynan di integridad. Lamentablemente ainda gobierno no ta tumando e tema aki na serio y no ta dunando prioridad na esaki" Lider di MEP a informa.

Den e sigiente dianan lo informa tocante e demas topiconan riba agenda na Hulanda.

Expresionnan haci den e articulo aki no necesariamente ta refleha opinion di ArenaPoliti.co