Pueblo di Aruba, via analisis politico hopi informacion ta bini padilanti pero for di un banda so! Con pueblo por analisa y evalua e propio analisis politico aki? Uno di peso of uno mediocre, hipocrita, partidista y oportunista? Di con pueblo mester haci su mes e pregunta aki? Motibo primordial di categorisa e analisis politico aki pa uno di poco balor y di ta sirbi pa nada, ta pasobra pueblo ta lesa absolutamente NADA di e partido cu ta na mando den e gobierno actual na Aruba. Algun punto di peso pa añadi y completa e analisis politico aki ta lo siguiente: Uno, un minister di e gobierno actual ta wordo declara dos biaha den Corte di Prome Instancia y un biaha den Hoger Beroep pa corupto, sinberguensa y di caracter fraudulento. Ainda su persona ta minister y Parlamento NO a presenta un mocion di desconfiansa den e minister aki. Dos, un parlamentario di e gobierno actual su auto tabata envolvi den un “accident”, di cual su persona a pone un familiar di dje carga e culpa di ‘hit and run’. E caso aki tambe a drenta e famoso “doofpot” di Ministerio Publico. Alaves e parlamentario di fam colebra aki ta registra bow nr 195018935-1 na Polis como un ladron cu a haci winkeldiefstal. Segun analisis politico: uno den droga si pero e otro cu ta ladron no! Bo ta analisa imparcialmente? Tres, e propio Minister President ta declara cu e suma di mas di 50 miyon florin cu e gobierno di AVP a uza inhustamente/no autorisa segun e rapport di Algemene Rekenkamer, a wordo inverti den e pueblo di Aruba. E sa bon bon cu ta horta esnan envolvi a horta e placa aki y varios hende a bay cera pa otro tambe. Consenti den maldad y ladronicia, anto bo ta Prome Minister? Awor e analisis politico ta bin papia di persecucion politico? Ta horta nan a horta e placa, bisa e berdad. Un tal Otmar tabata hinca completamente aden. Puntra sr. Tico Croes kende tabata orkestra e movemento di e cobramentonan. Cuatro,  un Prome Minister cu tabata brasa y fiesta cu un presunto criminal di Guajira, kende ta cera pa homicidio (morto) di mas di tres hende. Sabiendo cu e meneer aki tabata ser acusa for di prome cu Prome Minister a cera conoci cu ne, di ta meti den e mundo di droga y di arma. Pueblo por corda cu Prome Minister a priminti nan inmunidad politico na Aeropuerto di Aruba, pa nan trece fruta manera fruta cu tabata tin den e avion cu a wordo tumba den e awanan rond di Aruba? Cinco, atrobe analisis politico NO ta menciona nada cu Minister Otmar Oduber ta firma cu un criminal haya cu arma riba lama y despues ta atraca un banco na Noord. Oduber ta firma un contrato pa produci strawberry na Santa Rosa, pagando US$ 11000 sin cu Aruba a haya nada. Dicon no a cobra Oduber e suma bek? Seis, dicon analisis politico no ta menciona cu awor cu e Croesnan no ta cobra huur mas, cual cobramento AVP a condena y esaki tabata weso di lomba di dos campaña electoral y a gana tur dos eleccion cu e ponencia aki, toch e suma di huur no a baha sino a SUBI? Por fabor pidi gobierno pa publica e nombernan di esnan cu ta cobra huur y e sumanan. Dicon analisis politico no ta menciona kende ta e doño di e edificionan na Savaneta cu ta cobra 50.000 florin di huur for di gobierno, cualnan NO ta wordo uza? E placanan posiblemente ta bay pa paga debe di e doño na RBC? Huur di e edificio di Brenchie bieu na balor di 50.000 mil pa luna tambe?  Placa pa e miyonario malcria y medida pa e pueblo! Shete, dicon analisis politico no ta cuestiona e 13 parlamentarionan di AVP cu a vota manera hendenan bow di influencia, of menasa of sin celebro pa varios presupuesto di pais Aruba, hincando Aruba den debenan astronomico y lagando ruman chikito di analisis politico bira loco y kier a mata curpa den un huelga di hamber? Analisis politico mester cuminsa analisa politica di berdad y en general na Aruba y no publica na fabor di gobierno SO, pasobra lo tin cos di haya of cos pa cobra. Te cu awor e mester yama su mes: Analisis NO politico.

Expresionnan haci den e articulo aki no necesariamente ta refleha opinion di ArenaPoliti.co