Pueblo di Aruba, tin un proverbio cu ta bisa: ”Manera un cacho ta bolbe na loke cu el a saca, asina un bobo ta ripití su bobedad”. Asina actualmente ta e caso cu e situacion na Aruba. E Prome Minister ta keda insisti cu pais Aruba tabata den un tempo scur durante 2001-2009. Esaki tabata su storia for di ‘day-one’ despues cu su persona a drenta politica. E mes a crea su storia pa bende e pueblo di Aruba, pero consecuentemente el a bira victima y adicto na su mes storia. Un persona haciendo esaki por wordo categorisa cu e ta sufri di Narcissistic Personality Disorder (NPD). Na ingles e definicion ta: “a personality disorder in which a person is excessively preoccupied with personal adequacy, power, prestige and vanity, mentally unable to see the destructive damage they are causing to themselves and to others in the process”. Na Papiamento: un estado mental den cual un persona ta excesivamente preocupa cu su imagen personal, poder, prestigio y gloria propio, mentalmente incapaz pa mira e daño destructivo cu nan ta causando na nan mes y tambe na otronan den e proceso! Waw, esaki no ta cuadra cu e echonan di e Prome Minister? Loke ta di remarca ta cu e Prome Minister ta keda para riba cu su trabow NO ta uno desastroso pa  pais Aruba. Un punto cu pueblo mester compronde ta cu cifranan NO ta gaña!! Contrario na esaki, sr. Mike Eman si, anto riba un nivel di un gañado patologico! E lista pa prueba esaki ta mucho largo pa menciona! Recientemente sr. Eman ta publica cu simplemente no tin comparacion entre e tempo scur di gobernacion di MEP y e actual gobernacion. Den esaki sr. Eman tin completo rason. 1. Den e tempo di MEP e debe nacional a yega te alrededor di 2.3 biyon florin. Awor e debe nacional ta yegando 5 biyon florin. Mike tin rason! 2. Den e tempo di MEP, Hulanda NUNCA a guia  ni tabata tin mester di guía Aruba financieramente. Awor si pa medio di CFT. Atrobe Mike tin rason!
3. Den tempo di MEP, gobierno NO a hay’e obliga di firma ningun protocol for di cual e autonomía financiero di pais Aruba ta wordo entrega na Hulanda. Awor si anto firma pa e propio Prome Minister hunto cu su Angel de la Muerte Financiero di pais Aruba. 
Mas remarcabel ta, manera un lora bieu su persona ta keda ripiti e supuesto “logronan” cu cual e ta glorifica su mes cu nan: ”trece bek indexering, a introduci reparatietoeslag, a implementa un schoolkindertoeslag pa mamanan soltero riba bijstand y a redobla e bijstand. Sr. Eman por bisa tambe cu e mesun curashi y determinacion, cuanto MEDIDA su gobierno ta pasando pais Aruba?
E medidadanan a surpasa tur e cosnan duna na e pueblo, si of no? Kico su persona kiermen cu ”eerst groeien dan snoeien? Ta kende ta laga un mucha crece bira grandi pa despues corta su cabes?? Tambe e disco kibra di 8 aña no por sali for di su declaracionnan. Psicologicamente, sr. Eman den su supuesto mundo di NPD, sa bon bon cu e storianan aki, pueblo di Aruba a kere su persona pa dos eleccion consecutivo. Pesey e ta keda ripiti esakinan. Pueblo di Aruba no a ripara cu su persona NO por menciona nada otro, nada mas?! Pasobra e NO TIN otro logronan y tambe e lodo a dal den e fan! Tur hende a haya sa e berdad di sr. Eman su maneho!! Conclusion: un maheno desastroso, bergonsoso, descabeya y di ta entreguista di e autonomia financiero di pais Aruba. Simplemente hamber pa poder, sin cu ta sinti lo minimo pa e pueblo di Aruba, pero solamente pa gloria propio.
Como ultimo fayo garafal, ta e echo su sr. Eman ta declarando cu NO mester worry cu e protocol pero ta e resultado final ta conta pa Hulanda. Esaki ta pa kita e miedo di e13 parlamentarionan di AVP, p’asina nan por vota trankilmente pa e traicion na momento cu mester vota den Parlamento pa e ley di Landsverordening Financieel Toezicht, cu ta otorga nos autonomia financiero na CFT y na Hulanda.
AVP a daña cos, AVP ta traiciona nos! DIOS spaar Aruba.

Expresionnan haci den e articulo aki no necesariamente ta refleha opinion di ArenaPoliti.co