Nos a tuma nota cu nos Prome Minister Eman y tambe algun exponente di AVP ta tilda opocicion di ta treciendo un inkietud den Pueblo. No ta e mensahe di opocicion, pero e mal gobernacion di Gabinete Eman ta locual ta crea inkietud den Pueblo.

Nos di opocicion for di basta tempo caba a bin ta splica e realidad financiero di nos Pais, pero e makinaria di propaganda di Gabinete Eman pa sconde y manipula informacion a stroba e mensahe di yega na e mayoria di e Pueblo. Awe despues di intervencion di Hulanda, welga di hamber di nos Promer Minister y bou di e precion di e 24 medidanan di Gabinete Eman, Pueblo a bira inkieto. Claro e decepecion den Gabinete Eman y Minister Eman ta grandi. AVP a gana Pueblo su confiansa bisando cu Gabinete Eman no lo tuma medida y awor ta resulta cu no ta un sino 24 medida Mike Eman ta bin cune.

Pesey Prome Minister a core scirbi articulo di prensa bisando cu lo peor a pasa caba. Pero tur esnan na tino ta realisa cu awor a yega e ora cu Mike Eman ta bay pone Pueblo paga pa tur e desastre financiero cu Gabinete Eman a haci den apenas 5 aña di gobernacion. Ta cu 24 medida Eman ta bin pa masacra e cartera di Pueblo y esaki ta motibo di preocupacion berdadero . Si Gabinete Eman a goberna na drechi, nunca mester a castiga e Pueblo. Ta e mal gobernacion aki ta locual ta crea inkietud den Pueblo di Aruba.


12 februari 2015

Expresionnan haci den e articulo aki no necesariamente ta refleha opinion di ArenaPoliti.co