Durante un entrevista, Parlamentario pa partido MEP, sr. Guillfred Besaril, a reacciona riba esnan cu awe ta critica autoridad competente abase di e resultado di e investigacion den su contra di un aña pasa. E Parlamentario a declara lo siguiente:
"Na Aruba tin Parlamentario y algun miembro di prensa (comprometi) cu ta bula cu hala di manteca, pero kier pasa caricia solo! Mi a tuma nota cu desde cu e resultado di e investigacion den mi contra a bira conoci, tin cierto miembronan di prensa (comprometi) cu simplemente no por biba cu dicho resultado. Mi ta cumpli na ripiti cu Ministerio Publico por medio di Landsrecherche a laga conduci un investigacion profundo di e sucedido den cual mi tabata envolvi den dje aña pasa. Mi ta lamante cu ta bagatalisa e profesionalismo di e departamentonan cu a conduci, tanto e investigacion di trafico como e investigacion di Ministerio Publico. Aunke den tur sinceridad, mi a premira di siman pasa, cu nan lo no tabata ni Homber mucho menos Muher para den nan sapato pa bin dilanti y disculpa nan mes pa full e aña di acusacion falso cu nan a hiba contra mi persona.

Den e caso specifico di e miembronan di prensa (comprometi), mi tambe por bai over na tira cu lodo! Simplemente e no ta mi estilo di hiba Politica. Pero mi kier recordanan si, cu no ta ami tabata e chauffeur tras di wiel cu a causa un accidente na crusada di Mahuma cu a laga un persona mancaron te cu e dia di awe! Tambe tin un miembro di prensa (comprometi) cu por medio di un Editorial a tribi di cuestiona Husticia, pero cu e la lubida por completo con feliz y agradecido e tabata e tempo ey cu e mesun Husticia cu awe e ta critica, paso a bira dune un chens pa "SETTLE" su asunto pa no bin un caso contra dje y e bai sera na KIA! E ora ey si Husticia tabata bon! Ta bale la pena pa rato rato recordanan kende nan ta, paso hopi ta lubida cu mientras bo ta punta un dede riba un hende, tres ta punta riba bo mes!
Mas lamentabel di tur e reaccionan negativo di parti di esnan cu ta sostene e Gobierno actual, ta esun di un Parlsmentario(a), cu por cierto ta presidí e comicion fiho di Husticia di Parlamento. E miembro en cuestion di partido AVP, a haña ta bon y sin tene cuenta cu su funcion den Parlamento, di cuestiona Husticia, Cuerpo Policial y Ministerio Publico den nan trabow y profesionalismo. Mi ta haye un berguensa y totalmente inacceptabel, ya cu den su funcion e ta e prome yamá na respeta, accepta y si ta necesario hasta defende e trabow desplega door di profesionalnan den Husticia. 

Pero e reaccion di Parlamentario(a) en cuestion ta hiba mi na un pregunta masha importante den Pueblo: "Kiko ta realmente un Crimen?"
Den mi humilde opinion, un Crimen ta, ora cu un persona ta malusa su posicion politico, pa asina aki su pareha por ta den bestuur di un fundacion y strika bon placa di e fundacion aki enbes cu e fondonan wordo inverti den por ehempel deporte. Crimen ta, ora bo ta malusa bo posicion politico pa laga bo pareha sera contractnan di huur cuantioso, pues di hopi placa, pa boso dos por sigui biba lekker den cas riba custia di Pueblo. Crimen ta, ora cu pa medio dibo posicion politico bo ta laga bo pareha haya un contract lucrativo (Dienstverleningsovereenkomst) cu gobierno, pa di es forma ey sigui ranca for di caha di Gobierno, suta Pueblo y enriquese boso mes!

Esakinan "TA CRIMEN" y nada mas y nada menos CONTRA PUEBLO! Pa motibo cu bo ta malusa bo posicion politico y sin escrupulo alguno ta biba a la grandi, mientras Pueblo ta sufri cu tur e medidanan di Gobierno. Esey ta un CRIMEN! Mi ta lamenta cu e Parlamentario(a) aki a bai over asina di biaha na punta dede, hunga politica barata y inventa storia, promer cu como un Hurista responsabel, a sinta analisa nos leynan y warda mane un bon ciudadano riba e resultado final di e investigacion. Awor cu e pruebanan ta contundente y resultado ta riba mesa, mi recomendacion na e Parlamentario(a) aki ta, di stop di tira cu lodo y dedica su tempo mas na su mesun integridad. VOORAL na stop cu e CRIMEN cu e ta cometiendo cu placa di Pueblo!" Parlamentario Besaril a termina.

Expresionnan haci den e articulo aki no necesariamente ta refleha opinion di ArenaPoliti.co