Den un entrevista Parlamentario pa Partido MEP, sr. Besaril a duna su reaccion riba e declaracionan di Parlamentario, sr. Melvin Tromp. Parlamentario sr. Besaril a expresa lo siguiente:

"Mi a tuma nota di e reaccion di un collega Parlamentario cu obviamente mester por ta "Stimami" un mundo, ya cu cada biaha e tin mi nomber of caso den su boca! Continuamente e cabayero aki tin un storia diferente dimi, mientras cu Pueblo ta noticia nan kier! Djis un ehempel: Pueblo kier sa, especialmente for di un Parlamentario cu ta sostene e Gobierno actual, kiko e 24 medidanan ta cu lo ta hinca den e presupuesto 2015. E Parlamentario en cuestion tin e obligacion di rindi cuenta na Pueblo dicon CFT, IMF y diferente experto riba tereno financiero ta di opinion cu e 24 medidanan aki no ta suficiente pa resolve e problemanan serio di Aruba su finanzas publico. Mi ta convenci cu Pueblo kier pa e Parlamentario aki, ta mas pro-activo y si ta coba e kier coba den ley, anto e por cuminsa cu e Statuut di Fundacion Lotto pa Deporte. E por uza su tempo mihor na investiga kiko tin tras di e 72 mil Florin cu a wordo paga na camara di siguridad pa uzo personal. Esakinan ta djis algun ehempel di asuntonan cu e Parlamentario en cuestion por cuminsa na dedica su tempo na dje y cu sigur Pueblo lo aprecia. Di es forma ey e por cuminsa duna realse na su trabow den Parlamento. Na humilde opinion, e ta sin duda e tipo di informacion cu Pueblo merece na haya sa di su parti.

Den Pueblo tin un grupo Grandi cu ta bon harta cu cada biaha ta bini cu politica di "Ban tira cu Lodo" y di benta cu santo den wowo di hende pa asina fomenta rabia of duda contra otro enbez di eherce un trabow cu e Pueblo por ta contento cune. Lamentablemente e ta desepcionante tanto "Amor". No ta manera di dedica su tempo riba mi!

Den su declaracion, e Parlamentario en cuestion a expresa di ta respeta "Trias Politica" y cu su intencion no ta di cuestiona Ley of Ministerio Publico. Pero na final di su declaración e ta hasi todo lo contrario! Mi caso a wordo extensamente investiga pa Landsrecherche y Cuerpo Policial. A tene cuenta cu kiko tur Ley ta exigi di un chauffeur na momento cu ta trata un dalmento. Den mi caso mi a cumpli cu tur e exigencia, pues e Parlamentario mester siña biba cu e resultado di e Feitenonderzoek.

Pa loke ta trata e insinuacion cu falta un fragmento masha grandi y fulminante di e carta cu mi a ricibi di Ministerio Publico, lo siguiente. Mi kier laga bon cla na Pueblo cu ta 6 porta 7 regels, pues un alinea di e final di e carta (riba un segundo pagina) no a keda publica. Y alinea en cuestion tabata un reaccion di Ministerio Publico riba un carta cu mi persona a manda atravez di mi abogado na September 2014, den cual mi tabata informa na motibo pa cu e tardanza di e resultado di e investigacion. Pueblo por a tuma nota cu e duracion di e investigacion y e resultado final di esaki a duna espacio na e Parlamentarionan cu ta sostene Gobierno, especialmente esun en cuestion, tur oportunidad pa sinta specula, lastra mi y engaña Pueblo cu detayenan cu no por a substancia. Hecho ta cu den e alinea en cuestion Ministerio Publico a compronde mi frustacion, pero a duna nan opinion riba e aspecto aki. Pues na final, e no ta nada particular cu por cambia e esencia di nan decision despues di e feitenonderzoek, pues cu no tin motibo pa un investigacion penal formal den mi contra.
Mi ta invita e Parlamentario en cuestion pa concentra su "Stimacion y Energia" na investiga otro asuntonan cu ta mucho mas relevante pa Pueblo! Y pa e hasi esaki cu mesun fervor demostra pa su persona den pasado, na momento cu e Fundacion tabata tin un otro directiva. Investiga e contractnan di huur of e cuestion di camara y 72 mil Florin manera previamente menciona. Un bez mas, esaki ta e tipo di trabow cu Pueblo merece di haya for di su Parlamentarionan, enbes cu cada biaha ta purba na atacha otro por medio di redo of comportacion digno di un "Bar di Chines!"

E trabow di un Parlamentario ta uno serio. Mester dune su contenido; esun di guia y vooral controla un Gobierno, pa asina e Gobierno cumpli cu Pueblo como debe ser!" Parlamentario Besaril a termina.

Expresionnan haci den e articulo aki no necesariamente ta refleha opinion di ArenaPoliti.co