Na Aruba tin un cultura den gobierno cu si bo ta mi amigo mi lo premiabo cu un trabou super bon paga. Hopi biaha esaki ta e pago pa e fabor cu un persona ta haya pasobra e lo ta afilia nabo partido. Netamente esaki te caso cu e ultimo contract cu AVP a renoba di su coordinador cual ultimo dianan ta wordo hopi cuestiona pa su contenido y compensacion sin base.

E tipo di accionan aki sigur ta di condena y ta uno UNFAIR! Na promer lugar mester enfatisa riba e hecho cu un gran mayoria di e coordinadornan di AVP no ta capacita (sea cu un opleiding) of no tin suficiente conocimento y experiencia pa por hustifica e salario halto cu nan ta ganando. Den principio mester por splica kiko nan tarea ta y na ki tipo di responsabilidad esakinan ta mara. Hecho ta cu tin diferente factor cu por determina e compensacion husto pa un trabou cu ta wordo eherci pero e no mester sosode ne forma actual!  Ademas di esaki e ta inhusto pa nos studiantenan cu ta inverti den nan futuro pa medio di un studielening y hasta tin biaha cu hopi difficultad ta logra haya un trabou (tin caso cu no ta logra mes). E señal cu Gabinete Eman a manda pa pueblo  renobando e contract di su coordinador ta cu personanan sin hasi esfuerso por logra haya un trabou cu un schaal halto sin cu di berdad e merece y ta hustifica!

E cultura di contradiccion ta algo grandi den AVP pasobra kier papia di corta gasto mientras ta gasta placa di pueblo innecesariamente. E hecho cu mandatarionan ta kere cu nan por hasi y deshasi tumando yen hende pa un fabor politico ta decepcionante y na e mesun momento ta contradeci nan plan pa no yena of gasta placa adicional na personal. Den un reunion cu Minister di finansas a puntra si encaso e lo a pone un stop na recruta personal. Su contesta tawata cu no na hbo'er y wo'ers pero awor pueblo ta wak cu promer minister mes ta sigui cu un maneho pa loco cual aparentemente ni e Minister di finansas lo ta na altura di dje.

Bo por conclui cu e accion aki Gabinete Eman nunca kier a lead by example. E ta un realidad cu hopi placa ta bai na gastonan di personal pero loke ta bira mas cuestionabel ta e hecho cu coordinadornan ta gana hopi placa sin cu di berdad por substancia y duna balor na e produccion na trabou di esaki. Ta di lamenta cu miyones di placa di pueblo ta bai na e coordinadornan sin hustificacion siendo cu hopi biaha mes  tin ambtenaarnan ta keda sin haya por ehempel un promocion pasobra supuestamente no tin placa! Obviamente pa premia y compensa nan hendenan na un forma exagera si tin!

Expresionnan haci den e articulo aki no necesariamente ta refleha opinion di ArenaPoliti.co