Den un entrevista publica den un vespertino hulandes diabierna 20 di februari 2015 atrobe nos por a tuma nota di declaracionnan incorecto haci door di e titular di salubridad pa loke ta toca incorporacion di un sala di operacion (OK) den e proyecto di renobacion di hospital. Mi kier cuminsa pa refresca e minister su memoria, ya cu den e tempo cu decisionnan descabeya a wordo tuma door di su antecesor Visser, e ainda tabata fungi como longarts, y fulminando brutalmente contra sr. Visser.

Durante e periodo cu ainda ami tabata encarga cu e cartera di salubridad, e plan a wordo lansa pa construi un hospital completamente nobo na San Barbola cu lo a costa 217 miyon florin. E tempo ey sr. Frensel Giel di AIB a scirbi un rapport na unda e a descualifica e tereno na unda e hospital (HOH) ta situa awor aki, y a conseha fervientemente pa construi e hospital na un otro lugar. Despues di 2009 e gabinete Eman I a dicidi pa deshaci di tur plan cu lo por a sali for di e mente di e gobierno anterior, y particularmente a desacredita y ignora e plan pa un hospital nobo, y igualmente continuacion di entre otro cateterisacion na ImSan.

Sr. Bermello cu den pasado a logra di cobra parti di e 20 miyon dollar cu e fracaso di racetrack a costa pais Aruba - y no ban lubida cu esaki por a tuma lugar unicamente door di ayudo di mandatarionan Arubiano y tambe sr. Mike de Meza - diripiente a wordo introduci door di sr. Visser pa conseha riba e proyecto di renobacion di HOH. Sr. Bermello a desbarata por completo e plannan presenta anteriormente door di un compania di architecto hulandes, y a logra den un tempo corto “gana” e confiansa di e mandatario di salubridad, sr. Giel di AIB y SOGA.

E sala di operacion no a wordo incorpora den e renobacion riba peticion di hospital, pero a yega na nos conocimiento cu den 2009 un restructuracion a tuma lugar a base di un rapport haci door di Polytechnisch Ingenieursbureau di Aruba, y na unda a cumpli cu reglanan hulandes (NEN). Den e di dos mitar di 2013 hospital a laga sa cu e salanan di operacion no tabata cumpli mas cu e exigencianan di calidad hulandes y cu cambionan substancial mester a tuma lugar. Na mei di 2014 un compania hulandes a bay Miami pa presenta un plan na entre otro Bermello, AIB, SOGA, Infrateam y HOH.

Ta te despues di casi 9 luna Bermello a dicidi di presenta su plan pa un OK nobo, cu by the way a wordo rechasa door di empleadonan cu ta traha na OK. E plan lo a costa casi 11 miyon dollar, y mester a añadi casi 4 miyon dollar pa adapta e OK actual pa asina MediRisk (e seguro di HOH) por a sigui segura OK.

Lo mi ta desea di sa di e minister:

1. Unda a saca e informacion cu den e plan original un OK nobo tabata presupuesta;
2. Si e minister ta na altura di e motibonan cu e plan pa un hospital nobo a wordo hala un banda;
3. Si HOH a ricibi e 10 miyon florin cu gobierno a palabra ora e tereno a wordo traspasa pa SOGA;
4. Kiko a sosode cu e 40 miyon florin cu gobierno a haña di SOGA pa e tereno;
5. Pakiko e retraso pa atende cu construccion di un OK nobo;
6. Si minister ta na altura di e presentacion na mei 2014 cu a tuma lugar na Miami door di e compania hulandes Bussman;
7. Si e minister ta na altura cu construccion di e OK nobo no lo costa 6 te 7 miyon florin, pero 11 miyon dolar pa un OK nobo y 4 miyon dolar pa renobacion temporario di e OK actual;
8. Si e minister ta na altura cu e empleadonan di OK no ta contento cu e plan presenta door di Bermello na januari 2015;
9. Si e minister ta di acuerdo cu e construccion di e hospital ta encera cooperacion entre tres partner gobierno, SOGA y HOH y cu cada un tin nan propio responsablidad pa ehecuta un hospital adecuado pa garantisa un servicio optimal na nos pueblo;
10. Si e minister ta considera e directiva di hospital responsabel pa e probleman cu a surgi y e motibonan di esaki;
11. Si e minister ta na altura cu planificadornan tambe a lubida di tene cuenta y di presupuesta palonan di luz, y kiko lo ta e efecto di esaki riba e presupuesto total, considerando entre otro e trabao di cobamento y ponemento di kabel, etc.;

Pa finalisa mi lo kier a conseha Parlamento di Aruba pa para riba un aclaracion tocante e hoben longarts Arubiano cu no a logra di haña e oportunidad di eherce su profesion aki na Aruba, y tocante e peticion cu e minister a haci pa reanuda su profesion como longarts na hospital.

Tambe mester exigi di minister un respuesta di e investigacion cu a tuma lugar na sala di operacion riba un denuncia haci di posibel casonan di declaracionnan fraudulento door di cierto specialistanan.

Den nomber di Union Patriotico Progresista – U.P.P.
Candelario A. S. D. – Booshi – Wever
Brazil, februari 22, 2015

Expresionnan haci den e articulo aki no necesariamente ta refleha opinion di ArenaPoliti.co