Nos a tuma nota di un cantidad di articulo den prensa den cual lider di Fraccion di AVP, Baba Herde, ta haci un esfuerso grandi pa tilda opocicion di ta e culpabel cu cosnan no ta bayendo bon financieramente na Aruba, cu ta opocicion ta esun cu a lobby pa Hulanda interveni cu un KB y CFT riba Gabinete Eman y cu opoicicion ta aplaudi e maneho di CFT estilo ‘medida di MEP.’ Un barabaridad completo cu ta indica cu Baba kier plak CFT riba MEP pa sconde e desaster di Gabinete Eman.

EMAN A BOGA Y FIRMA PA CFT
Baba ta lubida cu ya for di 2010 caba Minister Eman a boga y firma pa e supervicion di CFT. Na 2010 minister Eman a firma e Protocol di cooperacion cu Minister Donner di Hulanda den cual CFT tabata forma parti pero no a durf di menciona e nomber ainda. Na 2013 Ministernan Eman y De Meza a firma e Acuerdo di Diahuebs Santo cu Ministernan Plasterk y Dijselbloem den cual CFT tabata un condicion, pero no a menciona su nomber pa no stroba resultado di eleccion. Despues bo ta haya e carta di ‘geen bezwaar’ di 6 februari 2014 firma pa Minister Yrausquin den nomber di Mike Eman su gobierno den cual supervicion di CFT ta poni como un di e condicionnan cu Gabinete Eman a bay di acuerdo cune. Tin e carta di 19 november 2015 den cual Minister Bermudez den nomber di Gabinete Eman ta invita CFT pa tira bista riba e presupuesto 2015. Banda di esaki tin e carta di 12 december 2014 cu Minister Plasterk ta informa Tweede Kamer cu Gobierno di Aruba a pidi CFT traha un rapport di experto riba e presupuesto 2015 y e cambionan di esaki. Sin lubida e rapport di CFT di 29 december 2014 den cual CFT ta confirma cu Gabinete Eman a pidi nan pa bin haci investigacion riba presupuesto 2015. Pues ta masha straño cu Baba no a lesa ningun di e documentonan aki. Baba tin e pudor di gaña bisa cu ta opocicion a boga pa CFT, pero tur protocol, carta y rapport ta mustra cu ta su lider Mike Eman mes a boga tur tempo y a firma pa CFT.

BABA MES TA PRO MEDIDA
Den e articulonan aki tambe Baba kier tilda opocicion di ta pro e medidanan. Aki atrobe Baba ta gaña. Ta su Gobierno di AVP a bin cu 24 medida cu nan a priminti na Hulanda y CFT. E mesun medidanan aki ta hinca den e Presupuesto 2014 cu Baba a grita VOOR pe. Pues ta Baba mes ta pro medida y no mester bin sconde tras di saya di opocicion awor.

AVP CULPABEL PA DESASTRE FINANCIERO
Ta bisto cu Baba ta haci su best pa plak CFT y medida riba MEP, pero Baba mester realisa cu e unico cu a boga pa CFT y medida ta su mesun partido AVP. Si Baba lo a haci su trabou di controla Gobierno manera mester ta, awe Aruba no lo mester ta pasando den e crisis financiero cu Mike Eman a traha pa nos. Baba mester realisa cu e unico culpabel aki ta su partido AVP y e mes cu cada bes a grita voor wowo sera. Enves di plak CFT riba opocicion, Baba por usa e tape ey pa stop di gaña e Pueblo manera e ta bin ta haciendo. Aruba Merece Mihor Baba!

25 februari 2015

Expresionnan haci den e articulo aki no necesariamente ta refleha opinion di ArenaPoliti.co