MEP: Baba Herde mester stop di manipula mente di pueblo treciendo mentiranan padilanti
Yegada di CFT y e 24 medidanan cruel ta danki na Gabinete Eman!
Ta increibel con despues di mas cu 2 siman pueblo Arubano ainda tin cu sigui soporta tur e barbaridad, manipulacion y mentiranan di lider di fraccion di AVP, Baba Herde, kende ta insisti cu ta partido MEP a trece e colegio di CFT na Aruba. Su manipulacion ta bay te hasta asina leu cu segun su persona ta partido MEP ta e culpable cu denter di poco 24 medida cruel lo wordo imponi riba lomba di pueblo. Sinembargo tur hende cu sano huicio na e momento aki mester ta na altura caba cu e 24 medidanan cruel ya a aparece den e presupuesto adapta di 2014 y pa cual Baba Herde a vota na fabor di e presupuesto aki, pues incluyendo e 24 medidanan y cualnan awe ta pisa riba su consenshi y cu tin’e den un ansha di desesperacion total.
Pa loke e instituto di CFT na Aruba, partido MEP kier a trece padilanti cu na mas cu 5 ocasion durante 2014, Gabinete Mike Eman a bay di acuerdo pa trece CFT na Aruba y pa demostra esaki MEP kier a referi na e siguiente parti di carta y acuerdonan cera cu gobierno Hulandes:
- Carta di “GEEN BEZWAAR” di 6 februari 2014 di Minister Yrausquin pa Minister Plasterk;
- Carta di Minister Yrausquin di 18 di februari 2014 pa Minister Plasterk;
- Acuerdo di 9 december 2014 cera entre e gobierno di Hulanda y di Aruba relaciona cooperacion cu CFT;
- Carta di Minister Plasterk di 12 december 2014 na Tweede Kamer;
- Carta di CFT di 29 december 2014 pa Minister Bermudez;
Pues, awor cu na 2015 CFT – riba peticion traicionero di Gabinete Eman – ta controla y vigila minuciosamente e presupeusto 2015 di pais Aruba, esaki siguramente ta un dolor inmenso pa Baba Herde, pero e mester baha for di lomba di MEP, busca den su propio seno di AVP e culpabel mayor y no tira culpa riba nos partido.
“Baba, ta bo gobierno corupto di AVP a destrui nos pais financieramente y awe ta bo mesun gobierno ta na rudia y tin cu duna cuenta na CFT y gobierno Hulandes”. Mea culpa!
Expresionnan haci den e articulo aki no necesariamente ta refleha opinion di ArenaPoliti.co