No por a spera otro: e asunto di nos bandera ta keda punto di discusion, te ora Parlamento y Gobierno di Aruba madura!

Hecho: fin di 1975, comienzo di 1976 a nace e idea pa un bandera propio pa y di Aruba. Un comision, presidi pa sr. Julio Maduro, d.f.m., a wordo encarga pa conseha e Eilandsraad di Eilandgebied Aruba di e tempo ey, encuanto e introduccion di un bandera Arubano. Pa yega na e bandera ey, e comision mester a organisa un concurso bao di Pueblo di Aruba, cu un “deadline” pa dia 16 di februari 1976.
E concurso ey a produci 693 diseño, cualnan tur a sirbi como punto di salida pa yega na un diseño definitivo. Cu ayudo y conseho di sra. Sarah Bollinger, representante di e “Flag Research Center” di Massachusettes, finalmente  Eilandsraad a yega na un decision encuanto e diseño definitivo.
E “Raadsbesluit” aki a haya e number Raadsbesluit No. 2509.
Dos dia despues e prome bandera di Aruba a wordo hisa den Wilhelmina Stadion, y esaki a socede door di e hobennan Angelique y Anthony Croes.

Un aña despues, dia 14 di maart 1977 e bandera a wordo regla den Ley mediante e “Vlagverordening 1977”, y publica den e Afkondigingsblad di Aruba, AB. 1977 No. 7. Despues na 1991 esaki a wordo reemplaza pa e “Landsverordening Vlag, Wapen en Volkslied”, y publica den Afkondigingsblad AB. 1991 No. 101.

Den curso di añanan e colornan, pa ta mas especifico e color BLAUW di e bandera, tabata punto di controversia y discusion continuo.
Aki aya bo tabata weita banderanan tambe unda e dos strepinan geel tabata posiciona casi meimei di e bandera.
Un persona cu na bida a bringa masha hopi mes pa e bandera haya e respet cu e merece, tabata sr. Leo M. Dorothal d.f.m., kende lamentablemente entre otro pa motibo di hostilidad den e propio seno cu mester a dune tur apoyo, no a conoce e satisfaccion di weita su bandera den e colornan cu Pueblo tabata desea.
Awor un bez mas Pueblo ta haye confronta cu un bandera cu un color blauw cu Pueblo NO a desea na fin di 1975, comienzo di 1976!
E color blauw cu Pueblo a desea, tabata e blauw un poco mas cla (“LICHT”), manera nos tur a custumbra cu ne caba.
Parlamento lo POR a vota pa un color blauw mas scur, hecho ta keda cu esaki NO ta deseo di Pueblo: mescos cu e gobierno di 1975/1976 a consulta cu su hendenan, habitantenan di Aruba, mescos awor aki tambe gobierno mester a consulta cu e Pueblo.
Den mi opinion NO ta keda gobierno nada otro, cu organisa otro referendum bao di habitantenan di Aruba pa un biaha mas Pueblo indica cua color blauw e ta desea pa su bandera. Pero e biaha aki lo mester duna Pueblo muestranan di e colornan blauw for di cua e por haci su escohencia; pone dos color blauw banda di otro, esta esun licht-blauw, y e color cu awor aki gobierno kier pusha Pueblo cu ne.
Si mayan gobierno cambia, e gobierno nobo mester haci esaki su prome prioridad; na aña 2016, 40 aña despues di introduccion di nos bandera na 1976, PORFIN e controversia encuanto nos bandera por yega na su fin.
Si e “codering” di e color blauw ta e problema, duna e color lichtblauw e code “aua1976”; problema resolvi! Y no bisami cu e color lichtblauw no ta existi: fix un colour-mixing, y ta cla!

Remigio A. R. (Mimi) Wever
Savaneta, maart 16, 2015