Evelyn Wever-Croes (MEP): Nos muchanan chikito merece miho cuido
Mester bin cu ley pa regula 'Kinder Opvang' cu urgencia
ORANJESTAD – Lider di MEP Evelyn Wever-Croes ta di opinion cu nos mester regula cuido di nos muchanan chikito mihor, en bista di e varios noticianan negativo cu ta saliendo riba algun creche na Aruba.
“Prome tabata e caso di abuso sexual posiblemente na un creche, despues e otro caso di un creche cu no tabata cumpli cu exigencianan di higiene minimo, y ni tabata tin coriente! Ta sumamente urgente pa e ley ey bin mas pronto cu ta posible, pasobra mayornan ta obliga di traha pa mantene nan famia, y den caso cu nan tin yiu chikito nan mester laga nan yiunan un caminda. Ta importante pa mayornan por confia cu caminda nan ta laga nan yiu ta cumpli cu e exigencianan, y cu tin instancia di gobierno ta controla esaki.
Den un ley asina mester pone exigencianan relaciona cu higiena y limpiesa, malesanan contagioso, seguridad, pero tambe pa loke ta trata e cantidad di personal necesario den relacion cu cantidad di mucha. Ta asina so mayornan por ta trankil unda pa laga nan yui.
Nos muchanan chikito merece mihor, nan merece un mihor cuido. Mientras cu nos no tin e ley aki, ta aconsehable pa mayornan tuma contacto cu Fundacion pa nos Muchanan cu por duna conseho riba e tereno aki. Mi ta spera cu e ley wordo traha liher, y cu e por wordo trata mes liher cu e ley di 6 minuut cu parlamentarionan di AVP a usa pa regla nan propio salarionan”, lider di MEP Evelyn Wever-Croes a duna di conoce.
Expresionnan haci den e articulo aki no necesariamente ta refleha opinion di ArenaPoliti.co