Dos siman pasa a tuma lugar e reunion den Parlamento tocante hedging, y hopi informacion alarmante a sali di e reunion aki, entre otro cu nos compania nacional di utilidad WEB su situacion financiero ta hopi delicado. WEB ya no por paga tur su debedornan, y esaki ta debi cu WEB a inverti den diferente proyecto di energia alternativo. Tambe tin informacion ta circula, no confirma, cu gobierno mes tin un debe astronomico na WEB y Elmar di casi un anja sin paga coriente.

Esaki a resulta cu na e momentonan aki e compania WEB lo ta pasando den un situacion financiero basta precario cual merece atencion di nos parlamento, pa evita cu ta pueblo lo tin cu paga pa tur esaki atrobe. En coneccion cu esaki fraccion di MEP a manda pidi un reunion publico pa asina por debati riba e situacion financiero y WEB su envolvimento cu diferente proyectonan. E ta hopi importante pa pueblo por ta na altura con serio e problemanan financiero di WEB ta, kiko a causa nan, ken tin di para responsabel pa esaki y tambe ki efectonan e diferente proyectonan tin riba WEB y pa nos parlamentario cuestiona a balor agrega di cierto proyectonan cu supuestamente ta pa yuda baha gasto, pero de facto a hinca WEB den hopi problema financiero.

Nos fraccion ta spera cu e reunion aki por wordo jama pa pronto nos haya mas claridad riba e situacion financiero di WEB.

Expresionnan haci den e articulo aki no necesariamente ta refleha opinion di ArenaPoliti.co