Fuera di Augustus 1977, luna di maart tabata un di e lunanan di mas importante den e lucha di nos pueblo pa su libertad, su Status Aparte. Asina nos a conoce e fecha di 16 di maart 1976 (aceptacion di nos himno y bandera den Eilandsraad), 18 di maart 1976 (inauguracion oficial di nos himno y bandera den Wilhelminastadion), 12 maart 1983 (aceptacion di nos Status Aparte na final di Conferencia di Mesa Rondo na Den Haag) y un fecha manera awe 38 aña pasa, esta 25 di maart 1977, caminda e promer Referendum consultativo a ser organiza den Reino Hulandes y esaki tabata na Aruba.

Dos alternativa
Nos tur por corda ainda e lucha tenaz cu a wordo hiba den añanan 70 pa nos lider inmortal Betico Croes y MEP, esta pa saca Aruba for di e constelacion Antiyano di 12-8. E pueblo Arubano semper a kere fielmente den Betico Croes y su partido MEP y na varios ocasion esaki a ser manifesta den e eleccionnan promer cu 1977, esta cu nos partido a ricibi mayoria absoluto, tanto den eleccion di Staten na 1973 como di Eilandsraad na 1975. Sinembargo e temponan ey nos opositornan politico constantemente tabata cuestiona cu si MEP di verdad tin e mandato pa realiza e causa di e pueblo Arubano. Ta pesey mes Gobierno di Aruba a dicidi pa organiza un Referendum consultativo den cual riba e papel di vota (stembiljet) a aparece dos alternativa, esta 1. Vota pa mantene Aruba den un Federacion di 6 isla, of 2. Vota pa un Aruba Independiente. Ora cu Gobierno di Hulanda y Gobierno di Antiyas a tende di e plan pa un Referendum, ambos gobierno a declara inmediatamente cu esaki no por, ya cu Statuut di Reino no ta duna espacio p’esaki. Sinembargo Betico Croes no tabata un politico di “Ja Baas”, pero a dal bay cu su plan visionario pa organiza e Referendum.Un comision pa informa pueblo debidamente y bao guia di sr. Carlos Bislip a haci un bunita trabao e tempo ey.

Boycot total
“Vox Populi Vox Dei” (Voz di Pueblo ta Voz di Dios) tabata e lema usa durante e temporada di preparacion y campaña pa e Referendum. E referendum - bao supervision di varios observador for di exterior - a tuma lugar dia 25 di maart 1977 y pueblo den su mayoria di 82.5 % a vota pa e opcion di Independencia. Alavez no mester lubida cu Betico Croes como un verdadero social democrata a duna tur hoben di 18 aña cu a nace aki y cu no tabata Hulandes, pero si inscribi na Censo, e derecho pa vota. Aki nos mester para un rato keto pa recorda pueblo con partido AVP a pidi pueblo pa no perde tempo cu e Referendum y te hasta a pidi nan hendenan pa bay lama, tene barbecue cu henter famia y p’asina demostra nan boycot total contra e Referendum aki. Sinembargo e pueblo Arubano den un forma positivo a responde na e yamada pa Referendum. Cu e resultado aki Betico Croes y MEP a haya e mandato pa transmiti na tur instancia local y internacional e deseo di e pueblo Arubano pa su libertad. Gobierno Antiyano y di Hulanda a menosprecia y bagateliza e resultado abrumador di e Referendum y hunto cu AVP tabata yamele ilegal y sin ningun valor alguno. Hecho ta cu 30 aña despues tanto Hulanda y tur e islanan di Antiyas tambe a sigui e ehempel di Aruba y a tene diferente Referendum riba tereno di structura estatal y constitucion Europeo, mientras cu no tabata tin nada regla den nan constitucion. Asina pues e pueblo Arubano lo sigui recorda cu hopi aprecio y respet e Referendum di 25 di maart 1977 cu a wordo realisa danki na e vision y curashi di e gran estadista Libertador Betico Croes.

Expresionnan haci den e articulo aki no necesariamente ta refleha opinion di ArenaPoliti.co