Ehecucion di proyecto Paardenbaai ta continua 

Den e maneho cultural di nos pais, Minister Otmar Oduber kier a inclui mas arte den areanan publico. cual ta un di e idea cu a sali for di e Cumbre Cultural Nacional. E proyecto di Paardenbaai ta e prome proyecto cu ta den pleno ehecucion bou di e capa di arte publico. Despues cu exitosamente a lansa e proyecto cu e prome cabay Rosalinda, awor cera conoci cu Ambrosio.

Ambrosio, e heroe inmortal simbolo di poder y nobleza.  Esaki ta e di dos cabay di un total di 8 cabay ubica den den pleno centro di ciudad cu ta representa e historia di Paardenbaai den siglo 16. E ta refleha e importancia cu Aruba tabatin dor di e negoshi cu tabata tuma luga na Paardenbaai, cu a pone Aruba riba mapa e tempo ey caba. E fantasia di e color blauw ta refleha e hecho cu e cabaynan ta sali for di awa despues cu nan tabata wordo lansa for di e barconan den e lama cerca di costa.

E proyecto Paardenbaai ta bay bek den tempo unda piratanan y nabegantenan tabata bataya den lama Caribe haciendo nan esfuerso pa controla e area maritimo entre e Inglesnan, Francesnan, Hulandesnan y Spañonan. Aruba, den e tempo ey a bira un localidad pa reestablece cabay y alimento.

Un di e momentonan bon documenta ta e bishita di Capitan Morgan, na aña 1668. Storianan ta conta cu Aruba tabatin un cantidad grandi di cabay. Peculiar pa e e nabegantenan ta cu nos hendenan local tabata uza e cabaynan pa transportacion te hasta entre distancianan cortico manera di 50 paso. E abundancia di cabay y interaccion di nos antepasadonan cu e bestianan aki sigur lo ta un sorpresa pa hopi.

Cu e proyecto aki enfocando riba nos historia ta traspasa parti di nos cultura na tur cu ta bishita nos centro di ciudad. Paardenbaai a wordo carga pa Aruba Tourism Authority y Mondriaan Fonds. Mondriaan Fonds ta un organisacion Hulandes cu ta sostene proyectonan cultural por medio di inversion financiero enfocando riba arte visual y herencia cultural.

Durante e dianan nos dilanti e otro 6 cabaynan cu falta, Bonifacia, Celestina, Eufrosina, Sinforosa, Saturnina y Escapia, lo haya nan ubicacion special den centro di nos ciudad. Hunto nan lo conta e storia di Paardenbaai na un audiencia extenso. Ta di suma importancia pa por tin arte accesibel na publico. Arte cu ta un aspecto cultural cu poco poco ta hayando mas atencion. Como parti di e maneho di Ministerio di Cultura kier crea excelencia cultural pa medio di proyectonan manera esun di Paardenbaai. Esaki ta e prome den un serie di arte publico na caminda.

Expresionnan haci den e articulo aki no necesariamente ta refleha opinion di ArenaPoliti.co