Minister di Cultura Otmar Oduber a bishita studio y a conbersa cu artistanan pa asina aki sa mas di nan experienca di a yuda compila y produci cancionnan importante pa Aruba su cultura.

E bishita tabata un momento sumamente emocional ora bo scucha  tur e experiencia di e cantantenan y musiconan cu tabata den studio na e momento ey pa loke ta e grabacionnan di e cancionan inmortal di antes, e mandatario ta bisa.

Minister Oduber a logra conbersa tambe cu Michael Lampe kende tin e encargo hunto cu Directie Cultuur pa ehecuta e proyecto aki hunto cu nos artistanan local. Varios di nan ta cantante, compositor, musiconan cu ta produci loke ta tumando lugar tur e siman cu a pasa.

Resona ta andando ya caba pa 2 pa 3 luna y lo culmina den luna di maart den cuadro di e celebracion di nos Himno y Bandera.

'E ta hopi bunita pa por tende un serie di cancionnan cu tempo mi mes tabata jong tabata scucha y canta, cu pa basta tempo no a wordo toca mas na radio emisoranan pa motibo cu e calidad di produccion no tabata al dia mas y scuchando e entusiasmo di e artistanan pa haci e grabacionan y a traha riba e produccion aki mi ta kere e tabata sigur bale la pena pa a bin cu e proyecto aki,' Minister Oduber a bisa.

Sigur e proyecto aki tin un valor agrega tanto pa e calidad di produccion di e cd, pero tambe e presentacionan na scolnan cu lo educa e generacion nobo riba nos folkore , unda e hobennan lo conoce e cancionnan aki presenta pa e artistanan di e generacion nobo. 

Minister Oduber ta hopi contento cu e artistanan mes a percura tambe pa pone riba pia y a gradici Michael Lampe tambe pa pone tur artista hunto pa produci Resona cu lo wordo presenta dia 16 di maart den Cas di Cultura.

Expresionnan haci den e articulo aki no necesariamente ta refleha opinion di ArenaPoliti.co