E contesta di AVP riba e instigacion, violencia y destruccion di MEP 

E desaprobacion ta total! E instigacion, e violencia contra cuidadanonan, e destruccion y e agresion cu MEP y su fanaticonan a comete siman pasa ta wordo condena den casnan di famia, den organisacionnan civil y sindicatonan, den empresa y departamentonan rond di Aruba. Tanto na Aruba como pafor di Aruba. Na Aruba hendenan di tur rond di nos isla ta haya e comportacion di e lidernan di MEP y e grupo di hende di MEP, totalmente inacceptabel. Por resumi e desaprobacion den algun palabra:"Nos ta un pais di paz y trankilidad. Y nos no kier niun hende kibra loke nos a traha asina duro pe." Den paisnan di Reino nan no ta compronde cu Arubianonan kier destrui nan propio pais cu ta bayendo miho cu cualkier otro di e paisnan di Reino. Un di e expresionnan tabata:"Net Aruba cu a haya e sla di mas duro, pero cu a recupera sin niun ayudo di Hulanda y mas lihe cu nos tur, no por bay daña loke ela logra. Mare tur pais por ta unda Aruba ta awe caba."

CONTESTA DI AVP
Pa motibo di e desaprobacion total di e instigacion door di lidernan di MEP y e agresion y destruccion cu nan a comete, hopi hende ta wak den direccion di Gobierno y di partido AVP pa wak kico ta bay haci pa stop e instigacion y agresion personal, e violencia innecesario y inacceptabel y e destruccion bez tras bez di e grupo cu ta wordo dirigi completamente door di e partido MEP. E lider di fraccion di AVP a duna un indicacion di kico AVP ta bay haci. "Nos a y lo sigui condena tur forma di instigacion cu mentira, agresion, violencia y destruccion manera nos a wak cu MEP y su grupo di fanatico ta cometiendo. Pa e motibo ey no spera instigacion, agresion, violencia of destruccion di nos banda como contesta riba nan agresion, violencia y destruccion. Loke si nos ta bay haci, ta haci un yamada na Pueblo pa hunto sigui construi nos pais. Y pa haci esaki cu mas fervor ainda. Pasobra e pais aki ta di nos tur y ta nos tur tin cu construi'e y cuid'e. Pasobra violencia y destruccion no ta sirbi niun meta y niun hende. Traha hunto pa nos tur bay dilanti si ta sirbi nos pais y nos tur." Ora a puntra sr. Herde si ta bay sigui accepta cu MEP ta instiga hende pa agredi hende personalmente enbez di hiba un debate politico manera mester ta den un democrasia real, ela contesta asina:"Nos ta propaganda y urgi un debate cu instrumentonan politico. Nos lo desea cu MEP tambe lo haci esey. Pero obviamente nan no kier esey. Nan kier destrui loke nos y e pueblo aki a construi. Lagu'e ta masha cla, cu nos no kier niun confrontacion di un parti di pueblo contra otro. Hamas! Pero tampoco nos lo laga MEP y su agresornan sigui agredi, ofende, menasa y comete violencia contra cualkier hende of contra e pais aki."

Expresionnan haci den e articulo aki no necesariamente ta refleha opinion di ArenaPoliti.co