ORANJESTAD – Diamars mainta, miembronan di fraccion Parlamentario di AVP tabata schouder cu schouder banda di boluntarionan pa drecha e destruccion cometi siman pasa. Ausente desde diahuebs ultimo ta tur miembronan di oposicion, esta MEP y PDR. Lider di fraccion berde, Rene Herde ta lamenta esaki y ta consider’e como un hipocresia di parti di e politiconan aki. “Bo no por yama hende pa bay guera, pa bay destrui y despues hunga cu imagen di Hesucristo. Esey ta blasfemia.”

Pa un siman largo contrincantenan politico a percura pa tabatin yamamento di hendenan, acusacion, menasa y agresion persona y hasta destruccion di propiedad publico. AVP di su banda, a opta pa reacciona sin agresion pasobra ta consciente cu ta nos prohimo y nos compatriota Arubiano. AVP a bisa no na destruccion di loke pueblo ta traha duro p’e. Na su luga ta enfoca riba drecha y construi, mescos a bin ta haci durante ultimo seis aña.

Parlamentario Herde a bay over na recorda cu a saca Aruba for di e abismo mas grandi y pone bek riba pia. “Nos no ta cla ainda, tin hopi mas pa haci,” el a menciona añadiendo cu cada biaha cu oposicion critica sin pone alternativa y destrui, AVP y ta construi y mustra cu si por miho den e pais aki pa tur hende. “No tin discusion cu ta construi nos mester construi e pais y no e menasa, violencia y destruccion cu nos a wak, paso tur hende ta condena esaki,” Herde a expresa.

Tambe a señala cu e propio ex Prome Minister Oduber a reconoce siman pasa cu ta visibel unda e placa di pueblo a bay, y esey ta na proyectonan grandi di infrastructura, reparatietoeslag, entre otro. Lamentablemente for di siman pasa diahuebs Lidernan di oposicion no a presenta mas den Parlamento. aki banda. Tampoco a condena e agresion, violencia y destruccion.

Na opinion di Herde y fraccion di AVP, simplemente no ta para tras di nan palabranan. “Bo no por ta un y e otro. Bo no por bisa cu bo ta contra manera nos a wak e lider di MEP ta haci, pero na mesun momento e ta instiga.” Segun e Parlamentario, e hipocresia aki pueblo simplemente no kier den un lider politico.

Expresionnan haci den e articulo aki no necesariamente ta refleha opinion di ArenaPoliti.co