Falta di liderazgo y tempo ta causa di nan frustracion!

E pregunta cu hopi hende na Aruba ta haci ta pakico MEP a scohe pa intimidacion di hende, agresion fisico y verbal contra hende, violencia y destruccion di propiedad di Pueblo. Kico MEP kier logra cu esey? Hende ta puntra si no ta e intencion di un partido politico den un democrasia, pa presenta plan, proposicion y ideanan pa mehora loke segun nan ta bay malo enbez di destrui loke a logra caba? E gruponan cu MEP a lanta den ultimo añanan tur ta wordo dirigi door di lidernan di MEP pa haci trabou sushi di MEP. Pero no tin duda cu tur e agresion y intimidacion di hende den nos comunidad ta trabou di MEP. E biaha aki ta e lider di MEP mes a yama e reunionnan. E mes a coordina e accionnan. Y nunca, niun caminda ela desaproba e intimidacion, agresion contra hende y destruccion di nos pais. Al contrario. Siman pasa ela bisa bon cla: esaki ta guera!!! Dunando asina otro preuba di sosten total na e accionnan di destruccion contra di nos pais y contra hende personalmente.

NO TIN PLAN NI TEMPO
E motibo real di MEP pa instiga agresion contra hende y destruccion di nos pais, ta cu den e dos añanan cu ta bin, tin asina hopi proyecto y desaroyo cu ta bay tuma luga, cu lo ta dificil pa MEP hiba un campaña pa gana eleccion. MEP ta sinti cu e mester para esaki. Den e dos añanan cu ta bin e recuperacion for di crisis ta continua, e crecemento di turismo ta sigui, tur e proyectonan di infrastructura ta bay den ehecucion of caba, gobierno ta bay yega na e punto di Presupuesto Balansa y stabilisa finansa publico. Pone aserca e posibel reapertura di e refineria, anto ta keda nada mas pa MEP keha didje. E proyectonan di infrastructura ta e waf grandi y nobo na Barcadera, e hospital totalmente renoba, e Green Corido entre San Nicolas y Playa, e Avenida Watty Vos cu lo conecta aeropuerto cu e area di Palm Beach. E desaroyonan aki ta bay crea e extra trabou pa nos hendenan cu nos ta busca. E ta bay crea e extra entrada pa famianan, pa negoshinan y pa gobierno cu nos ta busca. Politicamente no lo keda nada pa MEP bay critica AVP didje. Lo tin hopi mas hende na trabao y mas entrada rond di nos isla. E realidad aki ta loke ta causa e frustracion den MEP cu ta pone e lidernan kere cu nan mester para tur e desaroyonan aki y crea un chaos cu lo spanta hopi hende y companianan cu kier inverti. E miedo aki ta loke MEP tin mas cu dos aña ta purba crea. Nan no ta presenta un miho plan pa Aruba of bisca argumento pa mustra cu por miho. Nan no ta parse di tin e capacidad pa haci esey. Pesey nan ta recuri na  destruccion y agresion pa para e desaroyo aki. Nan kier crea chaos den nos pais y asina crea duda den e desaroyo di jos pais. Awor ta pueblo mes mester nenga di participa na e kibramento di nos pais y di loke hunto nos a construi den e ultimo 6 aña. Destrui nos pais no ta e caminda pa futuro. Nos tur mester bisa MEP "NO CONTA CU MI".       

Expresionnan haci den e articulo aki no necesariamente ta refleha opinion di ArenaPoliti.co