Partido MEP a tene su Congreso 2015 diadomingo 27 september den un Cas du Cultura completamente yen. Y manera ta cumstumber miembronan di partido por a presenta resolucionnan na nan partido. Un resolucion cu a wordo presenta ta toca nos autonomia financiero. Sr Doy Kelly a presenta esaki den nomber di hopi firmante mas y sala a duna aprobacion mesora cu un aclamacion fuerte. E resoluion ta basa riba e sigiente consideracionnan.

Partido MEP a wordo funda riba e deseo di nos pueblo di ta liber y e lucha incansabel cu a wordo hiba bou di guia di Betico Croes den felis memoria, a culmina den nos Status Aparte na 1986. E forma di goberna responsabel bou di guia di Nelson Oduber, a contribui cu nos a preserva nos autonomia. Lamentablemente pa motibo di mal gobernacion e gobierno actual a redobla e debe nacional di nos pais den apenas 6 aña. E papel cu gobierno di Reino a hunga den esaki ta dudoso, pasobra a permiti e gobierno actual redobla e debe nacional. Tur esaki a culmina den perdida di nos autonomia financiero cu introduccion di e ley di CAFT dia 27 augustus 2015. Y pa e motibo ey miembronan ta urgi partido MEP pa sigi hasi tur lo posibel y imposibel pa gana nos autonomia financiero bek y si mester, denuncia Gobierno di Reino y Gobierno di Aruba na instancianan internacional. E resolucion aki a wordo aproba unanimamente dia 27 september 2015 y den nomber di partido lider di MEP sra Evelyn Wever-Croes a duna su compromiso pa e lucha aki pa salba nos autonomia financiero.

Expresionnan haci den e articulo aki no necesariamente ta refleha opinion di ArenaPoliti.co