Durante fin di siman tras di lomba nos a sigi hopi di serca e situacion tenso cu tabata reina serca e controladornan aereo na Aruba. Despues di hopi tension, diadomingo merdia Minister Otmar Oduber a logra yega na un acuerdo temporario cu e controladornan aereo encuanto uzo di idioma durante comunicacion cu e pilotonan. 

Minister Otmar Oduber a hasi declaracion na prensa sigurando cu ICAO (International Civil Aviation Organization) tin un tratado internacional unda cu ta exigi pa e idioma oficial di comunicacion entre controladornan aereo y pilotonan ta ingles, argumentando di lo tin 2 documento cu ta respalda su ponencia. Documentonan cu te ainda e no a trese dilanti, y tampoco a specifica ki contenido nan tin.
Pero den e mesun declaracion aki, Minister Oduber ta splica tambe cu ICAO ta specifica cu e idioma di uzo permiti na cada pais ta esun original di e pais mes, y cu por tin un idioma secundario den uzo tambe. Aki Minister Otmar Oduber ta contradiciendo su mes claramente, y e tristo di tur esaki ta cu su declaracion no ta cuadra cu realidad completamente.

Nos a bay hasi un investigacion mas profundo riba e reglanan y regulacionnan di ICAO, y nos a bin topa cu den annex 10 e ta bisa claramente cu e idioma rekeri durante e comunicacion di aire pa tera ta esun original di e pais, of cu por tin un idioma secundario cual ta ingles. Como cu na Aruba nos idioma original ta papiamento y esaki ta wordo uza masha poco den nos region, a hasi ingles e idioma oficial di comunicacion entre toren di control y e avionnan. 
Na Aruba, teniendo na cuenta cu nos ta domina diferente idioma y 60% di nos turismo ta bin for di paisnan latino, ta uza inoficialmente e idioma spaño como idioma secundario den e asina yama "air-ground communications".

Pero e aña aki ANSA N.V kier exigi e controladornan aereo pa comunica unicamente na ingles, sabiendo cu hopi di e pilotonan aereo no ta domina e idioma ingles completamente, y cu esaki ta bira un peliger pa e seguridad di e avionnan cu ta aterisa na nos Aeropuerto Reina Beatrix, mirando cu por tin falta di comprendemento durante e comunicacionnan for di toren pa avion, cu lo por por trese peliger den e aspecto di seguridad .
Un problema innecesario teniendo na cuenta cu semper e controladornan a comunica den ingles y spaño sin problema.
Segun informacion, desde cu e cambio a tuma lugar no menos cu tres incidente a sosode den menos cu 4 dia, caminda cu pa falta di comprension den comunicacion pilotonan a compronde robes y por poco a surgi un desgracia. Den esaki mester elogia e profesionalismo di nos controladornan aereo cu a logra maniobra e situacion na un manera exitoso, evitando asina cualkier tipo di desgracia.

Minister Oduber ta bisa cu e controladornan aereo di Aruba ta certifica solamente na ingles y nunca a pasa un "proficiency test" pa certifica cu nan por comunica optimalmente na spaño. 
Mundialmente e controladornan aereo mester hasi un "proficiency test" di e idioma cu nan ta uza den nan trabou, y den e test aki nan mester por score minimo 4 (unda cu 6 ta e maximo) pa nan por ta apto pa traha. Actualmente na Aruba e controladornan aereo tin un score di 4 pa ingles, pero realmente nunca a pasa un “proficiency test” na spaño. Esaki ta e argumento cu Minister Oduber ta uza pa implementa e idioma ingles como uzo unico pa cu e "air-ground communications" na Aruba. Un argumento cu sigur ta hopi debil mirando cu Gobierno por a pidi e controladornan aereo pa hasi un "proficiency test" na spaño y asina sigi traha trankil na e manera cu nan ta custuma di hasi te awor. Trahando cu ingles como idioma primario y spaño como esun secundario, por ta mas sigur cu lo por evita cualkier problema pa cu e comunicacion entre Toren y avion.

Mi pregunta na Minister Otmar Oduber ta simpel; pakiko cambia un sistema cu ta trahando optimalmente pa decadanan, y asina pone trafico aereo na peliger manera a pasa algun dia atras? Segun e acuerdo hasi diadomingo 4 di oktober, ta bisa cu e controladornan aereo tin te cu december proximo pa hasi nan “profiency test” di idioma spaño pa asina nan por comunica temporalmente den ingles y spaño. Pero, si ya caba ta bay conta cu controladornan aereo certifica den idioma spaño, pakiko insisti den pone ingles como e unico idioma di comunicacion? Pakiko crea un problema innecesario poniendo mas preshon riba e trabou di e controladornan aereo, sabiendo cu e ta un trabou hopi duro riba su mes caba, y asina core e risico innecesario di trese seguridad aereo na peliger?

E ta un lastima cu un biaha mas Gobierno di partido AVP ta pone capricho y interes personal prome cu e ser humano su necesidad y seguridad.

Expresionnan haci den e articulo aki no necesariamente ta refleha opinion di ArenaPoliti.co