Parlamentario Chris Romero (MEP): Otmar Oduber ta contradeci su mes 2 biaha den menos cu 1 siman
![ChrisRomero14](/images/779x490/ChrisRomero14.jpg)
E Minister aki ta bisando mitar berdad encuanto ICAO y AIP
Den menos di un siman di tempo, Minister Oduber a contradeci su mes na dos ocasion encuanto e asunto di lenguahe di uzo pa controladornan aereo na Aruba.
Den un di su declaracionnan di siman pasa, Minister Oduber a bisa enfaticamente cu e lenguage cu mester wordo uza na Aruba den e “air-ground communications” ta ingles, sigurando cu esaki ta un regla specifico cu ICAO ta impone.
Y den un otro declaracion cu Minister Oduber a duna, el a hasi remarke di un AIP (Aereonautical Information Publication) cu Aruba a emiti na 2008 bisando cu e unico lenguage di uzo durante e “air-ground communications” mester ta ingles.
Pa splica den corto kiko ta e funcion di un AIP: Un AIP (Aereonautical Information Publication) ta un publicacion ariba tereno di aviacion cu ta specifica procedura y regulacion di cada pais ora e ta diferente cu esnan stipula pa ICAO. Akiden Aruba ta notifica e diferencianan, compara cu ICAO, cu e ta uzando.
Na 2008 ICAO a bin Aruba pa hasi un audit y e tempo ey e intencion tabata ta pa hasi ingles e unico idioma cu mester wordo uza den e comunicacionnan di aire pa tera. Despues di tempo a resulta cu ICAO mes no a sigui cu e palabracion aki mirando e problemanan cu otro paisnan tabata encontra cu e sistema di usa un solo lenguage.
Adicionalmente Minister Oduber a elabora riba e diferente incidentenan cu por tuma lugar, como consecuencia di uza diferente lenguahe durante comunicacion di toren di control pa avion.
Minister Oduber a trece padilanti cu den e manual di ICAO ta para claramente cu tin 3 diferente manera cu por ocasiona incidente/accidente: 1) Uzo incorecto di cierto frasenan. 2) Falta di dominio di e lenguage den cual ta comunica. 3) Uzo di mas cu un lenguage.
Pero Minister Oduber a demostra un biaha mas cu e no por wak mas leu cu su nanishi, pasobra si en berdad e lo a bay investiga e manual di ICAO (Manual on the Implementation of ICAO Language Proficiency Requirements Doc 9835), e lo no tin un postura asina ignorante encuanto e disputa di uzo di lenguage na Aruba su toren di control.
Ningun caminda den e manual aki di ICAO, ta para cu ta obligatorio pa uza unicamente ingles como lenguage di comunicacion. Loke si ta para den e manual di ICAO ta cu e idioma ingles mester ta disponibel pa papia durante e “air-ground communications”.
Ta parce cu pa complace su lider di campaña, cu ta director di ANSA N.V, Minister Oduber ta dispuesto na pone e seguridad aereo di Aruba na peliger. Si Minister Oduber lo a bay busca mas leu den e asunto aki, e lo por a lesa cu den parafo 4 ta papia cu na Mexico nan ta papia spaño como lenguage primario y ingles como lenguage secundario. Lamentablemente, aki nos ta mira cu Minister Oduber ta prefera di hasi politica cu un asunto asina delicado, y a dicidi di no sigi splica riba e reglanan y e diferencianan cu tin den e manual di ICAO cu tambe por ta aplicabel na Aruba.
Personalmente mi ta hay’e sumamente dificil pa compronde Minister Oduber su prioridad encuanto e asunto aki, mirando cu danki na henter e disputa aki por poco a pasa accidentenan riba pista di Aereopuerto di Aruba.
Minister Oduber ta papia di no kier bay sera pa incumplimento di reglanan di ICAO, pero si esaki tabata e caso e lo a pone un persona realmente cualifica como Director di ANSA N.V. Sr. Nilky Kock no ta un persona cu experticio ariba tereno di aviacion, y como tal e no ta e persona apto pa conseha Minister Oduber den e materia aki.
Aruba semper a evita di core e risico di un desgracia aereo, pero desde cu Nilky Kock a keda poni como Director di ANSA N.V, por poco 2 desgracia a sosode den un siman di tempo.
Si Minister Oduber tin miedo di bay sera pa e asunto aki, lo mi conseh’e pa bay traha riba e reglanan y hincanan den e AIP notificando ICAO cu Aruba ta uza Ingles como e leguage primario y spaño como secundario den “air-ground communications”, especialmente mirando cu awor e ta exigiendo e controladornan aereo pa cumpli cu un “proficiency test” na spaño. Hasiendo esaki ta habri caminda pa finalmente soluciona e problematica aki, cu den opinion di hopi ta innecesario
Expresionnan haci den e articulo aki no necesariamente ta refleha opinion di ArenaPoliti.co