Ta imposibel pa nos papia di un bon gobernacion ora bo mira cierto actitud cu partido AVP  y specialmente Minister Otmar Oduber ta tuma. 
Ta cuestionabel ora cu tuma nota, por ehempel, di con lider di campaña di Minister Otmar Oduber ta keda wordo involucra den diferente compania cu ta pertence na Gobierno di Aruba, sea como Director of den Raad van Commissaris.  Pa ta mas concreto, lider di campaña di Otmar Oduber ta fungi den ANSA N.V. como Director, pero tambe e ta miembro di Raad van Commissaris di Arubus y Aruparking, pero muy probablemente Monomunten fonds tambe. Esaki ta claramente un conflicto di interes grandi pasobra no por ta asina cu bo ta sinta como miembro di Raad van Commissaris di Arubus y tambe Aruparking unda cu un compania ta duna e otro contract y trabou. 
Aki nos ta mira claramente con Otmar Oduber ta eherciendo patronahe politico cu e tres of cuater companianan aki p’ asina beneficia su hendenan mas cercano. 
Un situacion totalmente inaceptable mirando cu tin mas Arubiano cu si ta realmente capacita pa ta den e puestonan ey. 
E situacion aki ta un di e tantisimonan cu nos por duna como ehempel di e sistema di patronahe politico cu ta forma parti importante y esencial den e maneho y Gobernacion di Gabinete Mike Eman II.

Minister Otmar Oduber semper a tilda partido MEP di a beneficia "friends & family", pero awe nos por comproba cu ta Minister Oduber ta esun cu si ta eherce patronahe politico den su campañadornan, amistadnan y famianan. 
Ora nos tira un bista riba e registronan di Camara di Comercio di tanto Arubus como Aruparking, nos por mira con Minister Otmar Oduber a pone su hendenan mas cercano como miembronan di Raad van Commissaris di e dos companianan aki. Hendenan cu ta sea famia, amigo di cas y/of campañador.

Tumando na cuenta e conflicto di interes, ta surgi e pregunta si e campañador di Otmar Oduber ta experto den e materia di parkeo, transporte publico y aviacion, cu e ta hinca den e companianan aki cu un puesto clave den e maneho. 
Mi ta puntra mi mes si aki par di tempo lo resulta tambe cu un otro campañador, amigo of famia di Minister Oduber tambe ta experto den arquelogia...?

Expresionnan haci den e articulo aki no necesariamente ta refleha opinion di ArenaPoliti.co