Na Aruba a tuma lugar recientemente un caso cu por a resulta catastrofal pa nos pais. Esaki tabata un caso na unda un avion chiquito casi ta accidenta cu un avion grandi yen di turista. Motibo di e sucedido aki tabata resultado pa cambio di maneho den e sistema pa opera cu e control aereo na Aruba. Controladornan aereo di Aruba a haya instrucion for di Director di ANSA Nilky Kock pa comunica solamente den di e idioma ingles. Na momento cu un controlador aereo di Aruba tabata cumpliendo cu e cambio di maneho manera instrui , un piloto latino no por a compronde instrucionan na ingles y como consequencia di esaki e tabata bayendo pa subi na unda un avion grandi cu turista tabata bahando. Mirando cu peliger grandi cu a tabata presentando na ultimo momento e controlador aereo a bai over pa duna instrucion na spanjo contra instrucionan duna y asina a logra di salba Aruba di un desaster cu por tabata tin consequencianan grandi pa Aruba. Tur hendenan ta consciente cu un accidente cu un avion cu turista por para turismo di Aruba den un tiro cu tur su consequencianan. Pesey mes mester investiga profundo kiko a pasa y esun responsable mester carga e consequencia.  Directie Luchtvaart Aruba (DCA)  a informa  cu e incidente ta wordo investiga dor di e departamento Aereo. Segun reglanan internacional di ICAO e idioma cu pilotonan y controladornan aereo mester comunica cu otro ta Ingles, pero tin e espacio tambe pa usa Spaño. P'esey ta stranjo cu Ansa ta prohibe e uso total di Spanjo of otro idioma cu no ta ingles. Mirando  cu e sucedido por tabata tin consequencia catastrofico pa nos pais, segun Parlamentario mr. Juan Ady Thijsen  e Ministro encarga cu ANSA mester carga e responsabilidad ministerial pa foutnan cometi pa su subordinario y mester tuma su retiro. Den caso cu Ministro ta haya cu e a worde mal guia( misleid) dor di e director di ANSA, e Ministro mester tuma paso contra e director tambe.

Expresionnan haci den e articulo aki no necesariamente ta refleha opinion di ArenaPoliti.co